Kóshi-qon zańnamasyn buzǵan Nıgerııa azamaty eline jete almaı júr
AQTÓBE. QazAqparat - Nıgerııadan Aqtóbege kelip, aǵylshyn tilinen sabaq bermek bolǵan Manas Ogaraıo eline qaıta almaı júr. Ol Kóshi-qon zańnamasyn buzyp, Qazaqstanda turý ýaqytyn ótkizip alǵan, dep habarlaıdy QazAqparat tilshisi.
34 jastaǵy Nıgerııa azamaty Manas Ogaraıo Aqtóbe qalasyndaǵy temirjol vokzaly mańynda qonaq úıde jatyr. Aqshasy taýsylǵan sheteldik azamatty jergilikti turǵyn óz qamqorlyǵyna alǵan. Al sol vokzal mańyndaǵy adamdar ony tegin tamaqtandyryp otyr. Otbasymen áleýmettik jeli arqyly habarlasyp, hat alysyp otyrady. Sebebi, telefon shalýǵa aqshasy jetpeıdi.
«Otanyma oralýdy armandaımyn. Men Aqtóbede júrgende ákem kóz jumdy, apam aýyr halde jatyr. Qazir aqsham joq, densaýlyǵym da syr bere bastady. Shynymdy aıtqanda, elime oralsam menen baqytty jan bolmas edi»,- dedi Manas Ogaraıo.
Sheteldik azamat Aqtóbege aǵylshyn tilinen sabaq berýge kelgen. Internettegi habarlama arqyly tabys tabýǵa kelgen Manas Ogaraıo jumys berýshimen kelise almaı, Qazaqstanda bolý ýaqytyn ótkizip aldy.
«Kóshi-qon zańnamasyn buzǵany úshin Nıgerııa azamatyna qatysty Qazaqstan aýmaǵynan shyǵarý týraly Aqtóbe qalalyq ákimshilik sotynyń sheshimi shyqty. Qazirgi kezde oblystyq ІІD kóshi-qon qyzmeti osy máselemen shuǵyldanyp jatyr»,- dedi Aqtóbe oblystyq ІІD baspasóz qyzmetiniń jetekshisi Erbolat Sarqulov.
Ákimshilik is qozǵalyp, sot sheshimi shyqty. Endi Manas Ogaraıo el aýmaǵynan ákimshilik jolmen shyǵarylady. Al oǵan deıin aqtóbelikter sheteldik azamatty qamqorlyǵyna almaq.
«Sheteldik azamatty kóshede kezektirdim. Baryp surap, basyna túsken isti bildim. Keıin kómektesýge sheshim qabyldap, qamqorlyǵy aldym. Onyń armany - eline oralý»,- dedi qala turǵyny Baýyrjan Molshybaev.
