Kóshi-qon zańnamasyn buzǵan 500-den astam sheteldik azamat Qazaqstannan shyǵaryldy - Astana qalalyq ІІD
ASTANA. QazAqparat - 28 qyrkúıek pen 2 qazan aralyǵynda elordada «Nelegal-2015» respýblıkalyq jedel-aldyn alý sharasynyń ekinshi kezeńi ótti.
Astana qalalyq ІІD-nen túsindirgendeı, «Nelegal» jedel-aldyn alý sharasy zańsyz kóshi-qonǵa qarsy áreket jasaý, zańsyz kóshi-qon arnalaryn anyqtaý, sheteldikterdi eńbekke zańsyz tartý faktilerin anyqtaý maqsatynda ótkizilip otyr. Shara aıasynda polıtseıler zańnama buzǵan azamattardyń ýaqytsha turatyn oryndaryn, qurylys nysandaryn, jertóle ǵımarattaryn, sondaı-aq adamdar kóptep jınalatyn jerler - bazarlar, qurylys nysandary, kólik jóndeý oryndary, kólik turaqtary, saıasajaı silemderi, ónerkásip aımaqtaryn tekserýde.
«700-ge jýyq sheteldik azamat QR-da bolý erejelerin buzǵany úshin ákimshilik jaýapkershilikke tartyldy. Kóshi-qon zańnamasyn buzǵan 442 adamǵa qatysty elde bolý merzimderi qysqartyldy, 174 adam Astana qalalyq ІІD-niń qabyldaý-bólýshisine ornalastyrylǵan. Mamandandyrylǵan aýdanaralyq ákimshilik sotynyń qaýlysymen 500-den astam sheteldik azamat QR kóshi-qon zańnamasyn buzǵany úshin QR syrtyna shyǵaryldy.
Budan basqa, sheteldik azamattarǵa qatysty eldiń syrtyna shyǵarý sheshimin oryndamaǵany, shekaradan qasaqana zańsyz ótkeni úshin qozǵalǵan 18 qylmystyq istiń sot aldyndaǵy tergeý amaldary júrgizilýde», - dep habarlady jedel-aldyn alý sharasynyń qorytyndylaryn Astana Qalalyq ІІD-niń kóshi-qon polıtsııasy basqarmasynyń bastyǵy, polıtsııa podpolkovnıgi Gúlvıra Dónenbaeva.
