Kóshi-qon úderisteri Qazaqstannyń áleýmettik-ekonomıkalyq jáne saıası jaǵdaıyna aıtarlyqtaı áser etedi - Senat Tóraǵasy

Búgin QR Parlamenti Senatynda «Qazaqstan Respýblıkasyndaǵy kóshi-qon protsesteri jáne kóshi-qon salasyndaǵy zańnamany jetildirý perspektıvalary» taqyrybyna arnalǵan ǵylymı-praktıkalyq konferentsııa barysynda sóz sóılegen Senat Tóraǵasy Qasym-Jomart Toqaev osylaı málim etti.

«Búgingi kúni halyq tyǵyzdyǵy bar-joǵy bir sharshy metrge 6 adamnan keletin Qazaqstan úshin kóshi-qon saıasatyn odan ári jetildirý asa qajet. Elbasy dál osy mindetti Qaýipsizdik Keńesiniń otyrysynda júktegen bolatyn. Kóshi-qon úderisteri kez kelgen memleketterdegi sekildi, Qazaqstannyń da áleýmettik-ekonomıkalyq jáne saıası jaǵdaıyna zor áser etedi. Resmı málimetterge qaraǵanda, elimizdiń jyl saıynǵy ishki kóshi-qony 300 myń adam, al syrtqy kóshi-qon 1 mln. adamǵa jetip otyr. Іshki ornyqtylyq pen turaqtylyqty esepke ala otyryp, tipti daǵdarys jaǵdaıynda da elimizdiń ekonomıkalyq jaǵdaıyna jáne ımmıgratsııalyq kóńil kúıine oraı, bolashaqta da kóshi-qon aýqymy arta túsedi dep boljanady», dedi Q. Toqaev.

Tóraǵanyń aıtýynsha, ishki kóshi-qon úderisine kóp jaǵdaıda qazirgi ýrbanızatsııa zor áser etedi. Sondyqtan da, aýyldyq óńirler men qalalyq jerlerge eńbek naryǵynyń teńgerimdiligi negizinde ekonomıkalyq belsendi halyqty qaıta bólýdiń tıimdi úlgisin qalyptastyrý mindeti tur.

«Al syrtqy kóshi-qonǵa keletin bolsaq, memleket tarapynan júrgizilgen keń aýqymdy reforma, sondaı-aq birqatar jaqyn jáne alys sheteldermen vızasyz rejimniń ornaýy nátıjesinde Qazaqstan eńbek jáne etnıkalyq kóshi-qon úshin tartymdy elge aınaldy. Eger ótken júzjyldyqtyń 90-shy jyldarynyń basynda elden syrtqa ketetinder sany jylyna 500 myń adamǵa deıin jetse, 2004 jyldan bastap bizdiń elimizge keletin adamdar sany ketýshilerden asyp túse bastady», dedi Q. Toqaev.