Kóshi-qon týraly zań jobasynda «mıssıonerlik qyzmetke» túbegeıli tyıym salynýy kerek - N. Ónerbaı
ASTANA. Sáýirdiń 15-i. QazAqparat /Qanat Mámetqazyuly/ - Kóshi-qon týraly zań jobasynda «mıssıonerlik qyzmetke» túbegeıli tyıym salynýy kerek.
Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda depýtat Nurlan Ónerbaı osyndaı pikir bildirdi, dep habarlaıdy QazAqparat.
«Kóshi-qon týraly» jańa zań jobasy eń aldymen etnıkalyq otandastarymyzdyń quqyn qorǵap, jaǵdaıyn jaqsartýǵa jumys isteýi shart. Al búgingi jobada qujattyń birinshi tarmaǵynan bastap «bosqyndar», «demeýshiler», «eńbek mıgranttary», «zańsyz kóship kelýshiler», «mıssıonerler» sekildi máselelerdi qamtıdy da, eń sońynan baryp «otandastar», «etnıkalyq qazaqtar» men «oralmandar» týraly jazylǵan. Shyndyǵynda, Qazaqstanda kóshi-qon týraly zań bolatyn bolsa, bul birinshi kezekte shetelden óz otanyna kóship kelýshilerdi qamtamasyz etýge baǵyttalýy shart. Onyń ústine, jańa jobada otandastarǵa túsinik bergende «KSRO-da nemese Qazaqstanda týǵan nemese budan buryn azamattyǵynda bolǵan jáne qazir shetelde turatyn azamattar» ǵana «otandastar» bolyp eseptelipti. Al, bizdiń kóptegen qandastarymyz keńes ókimetiniń tólqujatyn almaı-aq, bul ókimetke moıynsynbastan shetelge bas saýǵalaǵan. Sonda bular bizdiń otandastarymyz emes pe?!» dedi N. Ónerbaı.
Sonymen birge, depýtat qujattaǵy «mıssıonerlik qyzmet» máselelerine túbegeıli qarsy shyqty. Onyń sózine qaraǵanda, zań jobasynda «Qazaqstan aýmaǵynda óz qyzmetin júzege asyrýshy dinı birlestiktiń jarǵylyq erejelerinde qamtylmaǵan dinı senimdi dinı aǵartýshylyq qyzmet arqyly ýaǵyzdaý jáne taratý» dep kórsetipti.
«Jalpy, mıssıonerlik qyzmetke shekteý qoıyp zańǵa engizgenniń ózinde elimizge úlken zalal keledi. Bular erteńgi kúni sol arqyly bir kishkene tetik taýyp, elge jaıylady. Sondyqtan zań jobasynda «Mıssıonerlik qyzmetke tyıym salynady» degen bap jazylýy shart. Óıtkeni, biz qazirgi kúni óz qazaǵymyzdy óz dinimizge kirgize almaı, kirgenin saqtaı almaı otyrǵan haldemiz. Osy jaǵdaıda otyryp «aǵartamyn, oqytamyn, ýaǵyzdaımyn, din taratamyn, shoqyndyramyn» degen sekildilerdi byqsytyp otyrmyz. Jańa zańnyń jaqsy tustaryn badyraıtyp kórsetip, bildirmesten bir ǵana olqylyq arqyly búldirýge bolmaıdy», dedi depýtat.
