Kóshi-qon saıasatyn qalyptastyrý barysynda eń aldymen mıgratsııa týdyratyn faktorlarǵa yqpal etý joldaryn izdeý kerek - R. Muqashev
ASTANA. 19 mamyr. QazAqparat /Qanat Mámetqazyuly/ - Kóshi-qon saıasatyn qalyptastyrý barysynda eń aldymen mıgratsııa týdyratyn faktorlarǵa yqpal etý joldaryn izdeý kerek.
Bul týraly búgin Parlament Májilisinde «Kóshi-qon barysyn retteý mehanızmi: halyqaralyq standarttar men ulttyq zańnama» atty taqyrypta ótken dóńgelek ústel barysynda depýtat Rahmet Muqashev osylaı málim etti.
«Mıgratsııa memleket ómiriniń barlyq salasyn - demografııalyq jaǵdaı men halyqtyń densaýlyǵynan bastap eńbek naryǵyna deıingi aralyqtaǵy barsha máselelerdi qamtıdy. Búgingi kúni Qazaqstan halyqaralyq kóshi-qon aǵynyna belsendi aralasyp otyr. Sol úshin de elimizge eń aldymen kóshi-qon úderisterin naqty rettep otyrý máseleleri mańyzdy bola túsýde», - dedi R. Muqashev. Onyń aıtýynsha, elimizde Táýelsizdikten beri qaraı júrgizilgen demokratııalyq hám ekonomıkalyq qaıta qurýlar Qazaqstandy qabyldaýshy el retinde qalyptastyryp otyr. Bunyń ózi zańsyz kelýshilerdiń sanyn arttyrýda. Osyǵan oraı, depýtat bosqyndar, májbúrli kóship-qonýshylar men oralmandar máselesin tyńǵylyqty qaraý qajettigin alǵa tartady.
Bul rette depýtat R. Muqashev kóshi-qon salasyna qatysty fýnktsııalardyń Eńbek jáne halyqty áleýmettik qorǵaý mınıstrliginen Іshki ister mınıstrligine ótýiniń ózi elimizdiń jalpy kóshi-qon saıasatyna oń yqpal etetinin aıtyp, Qazaqstannyń ulttyq qaýipsizdigine de oń áser beretinin jetkizdi.
