Kóshi-qon salasyndaǵy zańdar qoǵamdyq qatynastardy jetkilikti deńgeıde retteı almaı otyr - Májilis depýtaty
sp;ASTANA. Qarashanyń 12-si. QazAqparat /Aıdar Ospanalıev/ - Eńbek mıgranttaryn tıimdi basqarý máselesi Qazaqstan úshin kúnnen kúnge ózekti bolyp barady.
Sońǵy jyldary elimizdiń ekonomıkasy qarqyndy damyp, respýblıkada kómirsýtegi resýrstary mol kólemde óndirile tústi. Qurylys salasy da damydy. Nátıjesinde memlekettiń kásibı biliktiligi joǵary sheteldik mamandarǵa degen suranysy áli kúnge saqtalyp otyr. Bul máseleni búgin Astanada ótip jatqan «Qazaqstan Respýblıkasyndaǵy jumysshylardyń kóshi-qon protsesin tıimdi basqarý - jumysshy mıgranttardyń quqyqtaryn qorǵaýdaǵy kásipodaqtardyń atqaratyn róli» atty dóńgelek ústel otyrysynda Májilis depýtaty Svetlana Ferho baıandady, dep habarlaıdy QazAqparat.
Onyń aıtýynsha, Qazaqstanda qazir álemniń 103 eliniń jumysshylary eńbektenip júr. «Úkimet «Nurly kósh» baǵdarlamasyn qabyldady. Árıne, ol oralmandardy turǵyn úımen qamtamasyz etý máselesin belgili bir deńgeıde sheship otyr. Mundaı sharalar oralmandardyń elimizge sińisip ketýine yqpal etetini de sózsiz. Soǵan qaramastan bizdiń kóshi-qon zańdarymyz qoǵamdyq qatynastardy jetkilikti deńgeıde retteı almaı otyr», dedi depýtat.
Onyń sózinshe, kóshi-qon salasyn retteıtin qoldanystaǵy zańda 200-den astam normatıvti-quqyqtyq aktiler bar. Olar barlyq jaǵdaıda bir-birimen baılanysa bermeıdi. «Biz keshe ǵana Májiliste eki zań jobasyn qaradyq. Olardyń biri bosqyndar máselesine qatysty bolsa, ekinshisi osy kóshi-qon salasyn retteýge baǵyttalǵan zań jobasynyń tujyrymdamasy. Al «Qazaqstan Respýblıkasyndaǵy kóshi-qon týraly» zań jobasy Parlamentke jeltoqsan aıynda kelip túsedi. Bul qujattyń mańyzy biz úshin zor. Óıtkeni onda Úkimettiń arnaıy kvotasymen keletin mıgranttardyń tizimi belgilengen. Sondaı-aq qujat talaptary boıynsha mıgranttardyń 4 kategorııasy kórsetilgen. Olardyń arasynda biliktiligi joǵary sheteldik jumys kúshterine erekshe oryn berilip otyr», dedi S.Ferho.
