Kóshi-qon polıtsııasynyń aǵa ıspektoryna qatysty sot úkimi jarııalandy
ASTANA. QazAqparat - Aqtaý qalalyq sotynda Mańǵystaý oblystyq ІІD Kóshi-qon polıtsııasynyń aǵa ıspektory A.Qanatbaevqa qatysty qylmystyq is qaralyp, tolyq aıaqtaldy.
Qylmystyq is materıaldaryna sáıkes, A.Qanatbaev Aqtaý qalasynda ornalasqan «Clavon Engineering Kazakhstan» JShS-niń ókili B.Maksımovadan shetel azamattarynyń tólqujattaryn rásimdeý úshin birneshe ret aqshalaı jáne áýejaı bıletteri túrinde para alǵan. Paranyń jalpy somasy 411 858 teńgeni quraǵan.
Mańǵystaý oblysy, Aqtaý qalalyq sotynyń úkimimen A.Qanatbaev Qazaqstan Respýblıkasy Qylmystyq kodeksiniń 366-babynyń 3-bóliminiń 4-tarmaǵy boıynsha (birneshe ret para alý) kináli dep tanyldy. Onyń jeke ózine tıisti múlki tárkilenip, ol ómir boıy memlekettik qyzmetpen aınalysý quqyǵynan aıyrylyp, 7 jylǵa sottaldy.
Sonymen qatar Aqtaý qalalyq soty Mańǵystaý oblystyq ІІD-niń basshysynyń atyna Kóshi-qon basqarmasynda oryn alǵan kemshilikterdi aldaǵy ýaqytta boldyrmaý týraly jeke qaýly shyǵardy. Úkim zańdy kúshine engen joq.
