Kóshi-qon máselesi Qazaqstandy aınalyp ótpeıdi - Tomas Helm
«Germanııada mıgratsııadan ózge másele joqtaı kórinedi. Shynynda da, kóshi-qon máselesi óte ózekti taqyrypqa aınaldy. Meniń oıymsha, jaqyn arada kóshi-qon salasyndaǵy úrdisterdiń aýqymy keńeıedi. Sebebi, ekonomıkalyq, áskerı jáne ózge de sebeptermen álemniń kóptegen elderinen halyq údere kóship jatyr. Rohındja sekildi aımaqtardyń turǵyndary kóshýge májbúr. Odan bólek, ádettegi eńbek mıgratsııasy bar», - dedi Tomas Helm L. N. Gýmılev atyndaǵy Eýrazııa ulttyq ýnıversıtetinde ótken «Mıgratsııa: jańa úrdister men baǵyttar» dóńgelek ústelinde.
Onyń pikirinshe, kóshi-qon máselesi qaryshtap damyp kele jatqan Qazaqstandy da aınalyp ótpeıdi.
«Kóshi-qon máselesi 8 mld-qa jýyq adam turatyn Jer sharyndaǵy árbir damyǵan memleketke áser etpek. Kúnnen-kúnge damyp kele jatqan Qazaqstan da keleshekte ekonomıkalyq jetistikterge jetken saıyn mıgranttar máselesine jıi tap bolady», - dedi Qor ókili.
Sonymen birge, T. Helm kóshi-qon máselesine kóz jumyp qarap otyrmaý qajettigin eske saldy.
«Mıgratsııaǵa qatysty kóptegen máseleler tyǵyz baılanysty. Áıtse de, mıgratsııanyń berer múmkindikteri de kóp. Máseleni durys sheshý joldaryn birlesip talqylaýymyz qajet. Munda tarıhymyzǵa qatysty málimdeme jasaǵym keledi. Mıgranttarǵa qarsy qorǵan turǵyzý - máseleni túbegeıli sheshpeıdi. Biz de óz tarıhymyzda qabyrǵa turǵyzyp kórgenbiz, onyń burys sheshim ekenin tarıh kórsetti», - dedi Tomas Helm.
Ókildik dırektory áleýmettanýshy stýdentter men ǵalymdardy erteń Astanada ótetin iri konferentsııaǵa shaqyrdy.
«Kóshi-qon máselesi boıynsha erteń Nazarbaev Ýnıversıtetinde konferentsııa ótedi. Sharany Qazaqstan halqy Assambleıasymen birlesip uıymdastyryp otyrmyz. Mıgratsııa men ıntegratsııa taqyryby boıynsha Qazaqstan men Germanııa teń dárejede pikir almasa alady», - dedi ol.
Dóńgelek ústel barysynda germanııalyq Bılefeld ýnıversıtetiniń professory Tomas Faıst Germanııaǵa kóship barǵan mıgranttardy qoǵamǵa beıimdeý týraly baıandama oqydy.
