Kóshi-qon qyzmetkerleriniń qylmystyq áreketteri áshkerelendi
ASTANA. QazAqparat - Almaty qalasynyń kóshi-kón qyzmetkerleri deldal arqyly shetel mıgranttaryn zańsyz rásimdep otyrǵan. Ol úshin qalanyń birneshe jerinde jeke menshik páterlerde «keńselerdi» de ashqan, dep xabarlaıdy QazAqparat.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń málimetine sáıkes, Almaty qalasy jáne Almaty oblysynyń kóshi-qon basqarmalarynyń laýazymdy tulǵalaryna qatysty sotqa deıingi tergeý sharalary bastaldy. Qylmystyq topta tórt adam bolǵan. Olar jaqyn shetelden kelgen eńbek mıgranttardy zańsyz tirkeýmen aınalysqan.
«Jedel izdestirý sharalary kezinde eńbek mıgranttaryn tirkeýge arnalǵan zańsyz keńse anyqtaldy. Sol jerde 800-den astam shetel azamattarynyń tólqujattary, jalǵan medıtsınalyq anyqtamalar, daktıloskopııalyq qujattar, fotoǵa túsirgeni týraly taza blankter jáne jalǵan eńbeksharttar tabyldy», - deıdi agenttiktiń baspasóz xatshysy Janna Bastarova.
Onyń sózine qaraǵanda, osy ýaqytqa deıin qylmystyq top 673 shetel azamatyna zańsyz ruqsat qujattaryn jasap bergen.
«Sottyń sheshimimen Bostandyq aýdanynyń ishki ister basqarmasy kóshi-qon bóliminiń bastyǵy Musanov polıtsııa maıory sheninen aıyryldy. Oǵan memlekettik qyzmette jumys isteýge tyıym salyndy. Budan bólek, ol 4,7 mln teńge kóleminde aıyppul tóleýge mindetteldi. Al deldal Shámsıev 760 myń teńge kólemindegi aıyppulǵa sottaldy. Qalǵan fıgýranttarǵa qatysty sotqa deıingi tergeý sharalary jalǵasýda», - dep atap kórsetti J.Bastarova.
