Kóshi-qon komıteti elordada 4 balasymen jertóleni panalaǵan anaǵa qatysty pikir bildirdi
NUR-SULTAN. QazAqparat – QR Kóshik-qon qyzmeti komıteti 4 balasymen jertólede turyp jatqan Bıbiǵaısha Isabekovaǵa qatysty resmı aqparat berdi, dep habarlaıdy QazAqparat tilshisi.
Birqatar BAQ betterinde Nur-Sultan qalasynda turatyn 4 balanyń anasy jarty jyldan beri jertólede turyp jatqany týraly aqparat taraǵan bolatyn. Kóshi-qon qyzmeti komıteti maqala keıipkeriniń baspana kezegine nelikten tura almaǵanyn túsindirdi.
«Zań boıynsha, respýblıkalyq mańyzy bar qalalarda turǵyn úıge muqtaj azamattardy esepke alý kezinde onyń qala aýmaǵynda turaqty kem degende 3 jyl turýy talap etiledi. 1974 jyly týǵan Bıbiǵaısha Bolatqyzy Isabekova tek osy jyldyń qańtar aıynda ǵana turǵylyqty jeri boıynsha Nur-Sultan qalasynda tirkelgen. Jeke kýáligin de alǵash ret osy kezde rásimdegen. Atalǵan kezeńge deıin Astanada tirkeýsiz jáne jeke basyn kýálandyratyn qujatsyz turǵan», - delingen resmı málimette.
Komıtettiń aqparatyna qaraǵanda, kópbalaly ananyń máselesi sot arqyly sheshilýi múmkin.
Qalalyq kóshi-qon qyzmetiniń tirkeý esebi boıynsha onyń 2019 jylǵa deıin elordada turǵany rastalmady. Azamatshaǵa óziniń qala aýmaǵynda qansha ýaqyt turǵanyn dáleldeý úshin QR azamattyq-quqyqtyq kodeksiniń 306-baby boıynsha sotqa júginý qajet», - dedi Komıtet.
