Kóshi-qon erejesin oryndamaǵan 2 myń sheteldik el aýmaǵynnan shyǵaryldy
ASTANA. Qarashanyń 27-si. QazAqparat /Rýslan Ǵabbasov/ - Bıylǵy qazannyń 19-y men 21-i aralyǵynda respýblıka aýmaǵynda zańsyz kóshi-qonǵa qarsy is-qımyl operatsııasy ótkizildi.
Іshki ister mınıstrliginde taratylǵan málimetterge qaraǵanda, atalǵan merzimde kóshi-qon, jol jáne krımınaldyq polıtsııa qyzmetkerleri zańsyz kóship-qoný is-qımyldary bolýy múmkin jerlerdi torýyldaý úshin jedel toptardy qurdy. Jolaýshylar poıyzdary, avtobýstary, sondaı-aq avtokólikter tekserilip, shekara mańyndaǵy eldi mekenderde tólqujat tekserý tártibi boıynsha is-sharalar júrgizildi. Operatsııany ótkizý barysynda Qazaqstan aýmaǵynda bolý tártibin buzǵan 15 myńǵa jýyq sheteldikter men azamattyǵy joq adamdar ákimshilik jaýapkershilikke tartyldy (onyń ishinde - 783 alys shetel, 14 myń 48-i TMD azamattary). Sot sheshimi boıynsha 2 049 sheteldik el aýmaǵynan shyǵaryldy. Munymen qosa sheteldik azamattardyń jumys kúshin tartý jáne paıdalaný erejesin oryndamaǵany úshin 341 jumys berýshi ákimshilik jazaǵa tartyldy. Atap aıtqanda túrli deńgeıdegi qylmys jasaǵany úshin 24 sheteldik azamat ustaldy. Sonymen qatar atalǵan shara barysynda izdeýde júrgen 215 adam quryqtaldy. «Kóshi-qon zańnamasy talaptary saqtalmaýyna baılanysty 24 qylmystyq is qozǵaldy»,-delingen taratylǵan málimetterde.
