Kósherbaev ýaqyt beldeýi týrasynda: keri áseri joq

ASTANA. KAZINFORM — QR Premer-mınıstriniń orynbasary Ermek Kósherbaev elimizdegi biryńǵaı ýaqyt beldeýiniń áseri jóninde pikir bildirdi.

Ермек Көшербаев
Фото: ШҚО әкімі баспасөз қызметінен

- Ýaqyt beldeýine qatysty máselege qysqasha toqtalǵym keledi. Tájirıbe kórsetkendeı, óńirlerdiń basym bóligi aıtarlyqtaı keri áserdiń joq ekendigin aıtyp otyr. Adam densaýlyǵyna, balalardyń oqý sapasyna, kommýnaldyq shyǵyndarǵa, jol qozǵalysyna jáne qylmystyń ósý dınamıkasy ózgeriske ushyramaǵan. Keıbir óńirlerde, ásirese, shyǵysta adaptatsııa protsesi jalǵasýda. Turǵyndarǵa tıimdi bolý úshin jumys ýaqyty ózgertilip, ol qazir bes jarymǵa taman aıaqtalady. Nátıjesinde qalǵan ýaqytty turǵyndar jeke basyna, otbasyna, balalaryna arnaýǵa kóbirek múmkindik alyp otyr, - dedi E. Kósherbaev Parlament Májilisiniń jalpy otyrysynda.

Onyń aıtýynsha, Memleket basshysynyń tapsyrmasyna sáıkes, Úkimet pen Parlament bul suraqty jan-jaqty qarady.

- Keshe ǵana fraktsııa otyrysy ótti. Ol jerde ortaq pikir qalyptasty, - dedi Úkimet basshysynyń orynbasary.

Atap aıtqanda, 2024 jyly 1 naýryzdan bastap Qazaqstanda ýaqyt bir saǵat artqa jyljydy.

Osydan keıin ózgeriske qarsy shyqqan qazaqstandyqtar buryn qoldanysta bolǵan ýaqyt beldeýin qaıtarý jónindegi petıtsııa jarııalady.

Eske salsaq, bıyl 11 naýryzda Májilistegi «AMANAT» fraktsııasynyń músheleri ózgergen ýaqyt beldeýiniń halyqtyń fızıkalyq jáne psıhıkalyq densaýlyǵyna, eńbek ónimdiligine jáne energetıkalyq resýrstardy tutynýǵa áseri týraly zertteý nátıjeleri boıynsha Úkimet esebin tyńdady.

Budan buryn habarlanǵandaı, elimizde biryńǵaı ýaqyt beldeýi engizilgen soń shyǵys óńirdegi halyq bul bastamaǵa narazy ekenin bildirgen bolatyn. Qazirgi tańda Shyǵys Qazaqstan oblysynyń 7 aýdanynda jumys kestesi ózgertildi.

 

Сейчас читают