Kósherbaev Shıeli men Jańaqorǵan aýdandarynda bıznesti damytý boıynsha otyrys ótkizdi

Sondaı-aq,  kásipkerlik nysandarynyń  jumystarymen tanysty, dep habarlady QazAqparat HAA tilshisi oblystyq ákimdikke silteme jasap.

 

Jańaqorǵan aýdanynda 159 gektar jerdi alyp jatqan agroındýstrııalyq aýmaqtyń saltanatty ashylýy ótti. Onda elektr jelisi men  aıaqsý júıesi tartylǵan, kógaldandyrý   jáne jylyjaılar qurylysyna  jer telimderi bólingen. Saıabaqqa arnalǵan 2 gektar jerge  1400 túp aǵash kóshetteri otyrǵyzylǵan. Bul jerge balalardyń oıyn alańdary, basseın salynady.  Búginde  jańaqorǵandyq 10 kásipker agroındýstrııalyq aýmaqtan jer telimderin alyp  kásiporyndar salýdy, 48 adamdy jumyspen qamtýdy josparlap otyr.  

 

Shıeli aýdanynda 2016 jyldyń naýryz aıynda táýligine 400  lıtr shubat óndiretin «Arýana» tsehy iske qosyldy. Kásiporynda 5 adam jumyspen qamtylǵan, al daıyn ónimder Almaty, Aqtóbe jáne Qyzylorda qalalarynda satylýda. Sharýashylyqty  ary qaraı damytý úshin  Saýysqandyq óńirinen 1800 ga jer telimi  alynǵan. 2017 jyldyń aqpan aıynan bastap qaımaq, ıogýrt, sút, aıran óndirý tsehtary  iske qosylyp, 5 adam turaqty jumyspen qamtyldy.

 

2016 jyly Shıelide «Móldir ı K» JShS qus fermasy ashylyp,  12 myń bas balapan ósirilýde.  Munda jylyna 3,5 mln. dana jumyrtqa óndiriletin bolady. Bolashaqta qus fermasyna 10 myń bas et baǵytyndaǵy balapandar ákelinip, jylyna  65 tonna qus eti óndirilmek.

 

Ótken jyldyń jeltoqsan aıynda Shıeli kentinde jalpy aýmaǵy 8 myń sharshy metrdi quraıtyn «Bereke» saýda úıi paıdalanýǵa berildi. Keshenniń aýmaǵyna 160 dúńgirshekten turatyn saýda ortalyǵy, 10 nómirli qonaq úı, oqý ortalyǵy, meıramhana men toıhana, balalar oıyn-saýyq pavılony ornalasqan. Munda 160 jeke kásipker jumys isteıdi jáne 250 adam jumyspen qamtylǵan.

 

Jańaqorǵan men Shıeli aýdandarynda ótken mıkro,-shaǵyn jáne orta bıznesti damytý jónindegi aktıv otyrystarynda  aýyldyq jerlerde kásipkerlikti damytýdyń ózekti máseleleri talqylandy.