Kósherbaev shekaralas eldermen yntymaqtastyqty damytý úshin Ózbekstanda boldy

QYZYLORDA. QazAqparat-Qyzylorda oblysynyń ákimi Qyrymbek Kósherbaev bastaǵan delegatsııa shekaralas óńirlermen yntymaqtastyq baılanys máselelerin talqylaý maqsatynda jumys saparymen Ózbekstan Respýblıkasynda boldy, dep habarlady QazAqparat HAA tilshisi oblystyq ákimdikke silteme jasap. 

Sapar Ózbekstan Respýblıkasynyń tuńǵysh Prezıdenti Islam Karımovtyń Samarqand qalasyndaǵy Shahı Zında kesenesindegi beıitine gúl shoqtaryn qoıýdan, sondaı-aq dańqty qolbasshy, jerlesimiz - Jalańtós Bahadúrdiń kesenesine táý etýden bastaldy.

Delegattar birqatar kásiporyndardy aralap, kásipkerlermen jáne jergilikti kompanııa basshylarymen kelissózder júrgizdi. 

Sonymen qatara Qyrymbek Kósherbaev Samarqand oblysynyń ákimi Hımmat Okbýtaevpen kezdesti. Onda taraptar Qyzylorda jáne Samarqand oblystarynyń arasyndaǵy óndiristik jáne saýda-ekonomıkalyq yntymaqtastyqtyń perspektıvalaryn talqylady.