Kósherbaev saıası qýǵyn-súrgin qurbandaryn aqtaý jónindegi komıssııanyń basty mindetin atady
Memlekettik komıssııanyń alǵashqy otyrysynda QR Memlekettik hatshysy Qyrymbek Kósherbaev osylaı dedi, dep habarlaıdy QazAqparat tilshisi.
«Ózderińiz belgili, Táýelsizdiktiń alǵashqy araıly tańynan bastap biz óz tarıhymyzǵa jańasha qarap, eldiń ótkenin zerdelep, elekten ótkizýge bet buryp kelemiz. Sol jaýapty iste Elbasy Nursultan Ábishuly Nazarbaevtyń tikeleı bastamasymen 1993 jylǵy sáýirde qabyldanǵan saıası qýǵyn-súrgin qurbandaryn jappaı aqtaý týraly QR zańy yqpaldy normatıvti tetikke aınaldy. Jaqynda jazyqsyz aıyptalǵandardy aqtaýdyń jańa kezeńiniń quqyqtyq qujaty qabyldanyp, Memleket basshysy Qasym-Jomart Kemeluly Toqaevtyń saıası qýǵyn-súrgin qurbandaryn tolyq aqtaý jónindegi memlekettik komıssııa týraly Jarlyǵy jaryqqa shyqty. Endigi jerde aldymyzda asa aýqymdy mindetter, kúrmeýi sheshýdi qajet etetin kúrdeli tarıhı máseleler tur», - dedi Qyrymbek Kósherbaev memlekettik komıssııanyń otyrysynda.
Memlekettik hatshy osy rette bul iske komıssııa múshelerin barynsha baıyppen qaraýdy surady.
«Memlekettik komıssııa emotsııaǵa berilip, daý-damaıǵa jol beretin dıskýssııa alańy emes. Bizdiń maqsatymyz – ornyqty sheshim qabyldap, tarıhı ádilettilikti qalpyna keltirý jolyndaǵy joǵary kásibılik pen ádildikke qaltqysyz qyzmet etý ekenin esterińizge salamyn», - dedi Memlekettik hatshysy.
Qyrymbek Kósherbaev Memleket basshysy Qasym-Jomart Toqaevtyń bıyl saıası qýǵyn-súrgin jáne asharshylyq qurbandaryn eske alý kúnine oraı jasaǵan úndeýinde HH ǵasyrdyń 20-50 jyldaryndaǵy saıası qýǵyn-súrgin zobalańy halqymyzdyń tarıhyndaǵy qasiretti kezeń ekenin atap ótip, tarıhı ádildikti qalpyna keltirý jumystaryn aıaqtap, saıası qýǵyn-súrgin qurbandaryn aqtaý úshin arnaıy memlekettik komıssııa qurýdy tapsyrǵanyn eske saldy.
«Mine, atalǵan tarıhı mıssııany atqarý mindeti osynda otyrǵan barshamyzǵa júktelip otyr. Bul mindetti biz jazyqsyz japa shekkenderdiń rýhyna taǵzym etý úshin jáne jas urpaqty jańa jasampaz sanamen tárbıeleý úshin oryndaýymyz qajet. Álbette, sol zamandaǵy solaqaı saıasattyń saldarynan bolǵan saıası qýǵyn-súrginniń zardaptaryn Keńes Odaǵyndaǵy barsha halyqtardyń tartqany aqıqat. Desek te óziniń taǵdyr-talaıynda myń ólip, myń tirilgen halqymyzdyń HH ǵasyrdyń alǵashqy jartysynda kórgen azaby men qasiretin sózben aıtyp jetkizý qıyn ekeni belgili. Ótken júzjyldyqdyń 20-30 jyldaryndaǵy kúshtep ujymdastyrý, tárkileý ultymyzdyń ǵasyrlar boıy ornyqqan ómir saltyn buzý áreketteri qazaq halqynyń qynadaı qyrylýyna ákep soqtyrǵany aşy shyndyq. Sondaı soraqy áreketterge shydamaı, azamattyq quqyǵyn talap etip atqa qonǵan qazaqtardyń 372-ge jýyq bas kóterýine de buryndary bir jaqty baǵa berilgeni belgili. Ultymyzdy órkenıet kóshine qosýǵa umtylǵan Alash arystaryn qýǵynǵa túsirgen 1937 jyldyń saıası naýqany jurtshylyqtyń áli de jadynda tur», - dedi Qyrymbek Kósherbaev.
