Kósherbaev pen Ábishev Syrdarııa arnasyn tekserip shyqty
ASTANA. QazAqparat - Demalys kúnderi Qyzylorda oblysynyń ákimi Qyrymbek Kósherbaev pen QR AShM Sý resýrstary komıtetiniń tóraǵasy Islam Ábishev tikushaqpen Jańaqorǵan, Shıeli, Syrdarııa, Jalaǵash jáne Qarmaqshy aýdandaryn aralap, Syrdarııa jaǵalaýynyń jaı-kúıi men sý basý qaýpi bar aımaqtardy tekserip shyqty, dep habarlaıdy QazAqparat.
Oblys ákimdiginiń baspasóz qyzmeti taratqan aqparaqta qaraǵanda, olar beıindi mekeme basshylarymen birge Shıeli aýdanyndaǵy bógetti tekserip, Syrdarııa aýdanyndaǵy jańa kópirdi, Qarmaqshy aýdanyna qarasty Jańajol aýyldyq aımaǵynyń tóńiregin qarap shyqqan.
«Aǵymdaǵy jyldyń qańtar-sáýirinde Syrdarııanyń sý jiberý kórsetkishi shamamen 13 mlrd. tekshe metr boldy. Mundaı kórsetkish sońǵy 117 jyldyń ishinde tek 1969 jyly ǵana bolǵan edi. Sý kólemi taǵy da artýy múmkin. Óıtkeni, boljamǵa sáıkes 2-16 mamyrda nóser jaýyn jaýýy múmkin. Onyń ústine Qarataý shyńdarynyń qary áli erigen joq. Biraq, turǵyndar úshin aıtarlyqtaı qaýip te joq. Ózen arnalarynyń boıynda jaýapty tulǵalar belgilenip, kezekshilik qoıylǵan», - dedi Islam Ábishev.
Qyzylorda oblysynyń ákimi Qyrymbek Kósherbaevtyń aıtýynsha, óńirdegi eldi mekenderdiń 85, halqynyń 93 paıyzy Syrdarııa ózeniniń boıynda qonystanǵan.
«357 myń adam turyp jatqan 56 eldi mekenge qaýip tónip tur. 84 myń úı men 247 myń bas mal sý basýy múmkin aýmaqta tur. Sondyqtan biz Aýyl sharýashylyǵy mınıstrligimen, Sý resýstary komıtetimen, tótenshe jaǵdaılar organdarymen, jergilik kásipkerlermen birlesip, sý tasqynynyń qaýipsiz ótýin qamtamasyz etý úshin jumys isteýdemiz. Buǵan qosa ótken aptada QR Premer-Mınıstrimen Shıeli aýdanynda syıymdylyǵy 600 mln. tekshe metr bolatyn Kúmisketken sý qoımasyn salý jobasy talqylandy. 15-20 mamyrǵa deıin myna úlken sýdyń úlken problemaǵa aınalmaýy úshin tótenshe jaǵdaı rejiminde jumys isteıtin bolamyz», - dedi Q.Kósherbaev.
