Kósherbaev Parıjge resmı saparmen barýy múmkin

ASTANA. KAZINFORM — Frantsýz tarapynyń bastamasymen Qazaqstan Respýblıkasynyń Syrtqy ister mınıstri Ermek Kósherbaev Frantsýz Respýblıkasynyń Eýropa jáne syrtqy ister mınıstri Jan-Noel Barromen telefon arqyly sóılesti, dep habarlaıdy SІM baspasóz qyzmeti.

Suhbat barysynda taraptar ekijaqty yntymaqtastyq máseleleri boıynsha pikir almasty jáne ózara qurmet, senim men syndarly dıalogqa negizdelgen qazaq-frantsýz qatynastaryn odan ári nyǵaıtý mańyzdylyǵyn atap ótti.

Mınıstrler ózara qyzyǵýshylyq týdyratyn yntymaqtastyqtyń keń aýqymdy baǵyttaryn qarastyryp, Astana men Parıj arasyndaǵy seriktestikti odan ári tereńdetýge daıyn ekenin bildirdi.

Suhbattastar saıası dıalogty tereńdetýge, turaqty baılanystardy saqtaýǵa jáne vedomstvoaralyq yntymaqtastyqty jandandyrýǵa beıildiligin rastady. Atap aıtqanda, 2024 jylǵy qarashada QR Prezıdenti Qasym-Jomart Toqaevtyń Frantsııaǵa memlekettik sapary men 2025 jylǵy qyrkúıekte BUU Bas Assambleıasy alańynda Nıý-Iorkte ótken memleket basshylary kezdesýiniń barysynda qol jetkizilgen ýaǵdalastyqtardy júzege asyrý barysy talqylandy.

Qorytyndylaı kele, E.Kósherbaev Parıjge resmı saparmen barýǵa daıyn ekenin málimdedi jáne frantsýz áriptesin Qazaqstanǵa saparmen kelýge shaqyrdy.

Aıta keteıik, Frantsııa — Qazaqstannyń negizgi saýda seriktesteriniń jáne iri ınvestorlarynyń biri. 2024 jyly eki el arasyndaǵy taýar aınalymy 4,22 mlrd AQSh dollaryn qurady (eksport — 2,89 mlrd doll., ımport — 1,33 mlrd doll.), al ınvestıtsııalardyń jalpy kólemi 20,4 mlrd AQSh dollarynan asty.

Osyǵan deıin Prezıdent Ermek Kósherbaevqa ekonomıkalyq dıplomatııany kúsheıtýdi tapsyrǵanyn jazǵanbyz.