Kósherbaev Qyzylorda qalasy halqynyń sany 350 myńǵa jetetindigin boljady
QYZYLORDA. QazAqparat - Oblystyq máslıhattyń kezekti sessııasynda oblys ákimi Q.Kósherbaev Syrdarııa ózeniniń sol jaǵalaýyn ıgerý boıynsha atqarylyp jatqan jumystar týraly baıandady.
«Aldaǵy perspektıvada Qyzylorda qalasynyń sol jaǵalaýyn ıgerý mindeti tur. Búginniń ózinde oblys ortalyǵynda halyq sany 280 myń adamnan asty. Taıaý bolashaqtaǵy ýrbanızatsııa deńgeıin, demografııalyq jáne kóshi-qon faktorlaryn eskeretin bolsaq, aldaǵy kezeńde qala halqy 350 myń adamǵa jetedi degen boljam bar. Demek, turǵyn úı qurylysyn damytýǵa qosymsha aýmaq qajet etiledi», - dedi oblys ákimi.
Q.Kósherbaevtyń aıtýynsha, bıyl sol jaǵalaýmen baılanystyratyn kópir qurylysy aıaqtalady. Sol jaǵalaýdyń ınjenerlik ınfraqurylymyn damytý jobalary daıyn jáne memlekettik saraptamamen maquldanǵan. Qazir ony ınvestorlarmen memlekettik-jekemenshik áriptestik aıasynda jáne Azııa damý bankimen iske asyrý múmkindigi qarastyrylýda.
Aımaq basshysy sol jaǵalaýdy ıgerýge qarjy tartý ońaı sharýa emes, degenmen bastaǵan is aıaqsyz qalmaýy úshin táýekelge barýǵa qoryqpaý qajettigin aıtty.
«Osy jobalardy memlekettik baǵdarlamalar sheńberinde júzege asyrý úshin respýblıkalyq bıýdjetten nysanaly transfertter tartýǵa jumys jasalýda. Biraq, basymdyq - memlekettik-jekemenshik áriptestikke beriledi. Sol jaǵalaýdy ıgerýge mundaı qomaqty qarjyny alý, árıne, ońaı sharýa emes. Qazirgi daǵdarys jaǵdaıynda biz olardy segmentteı otyra iske asyratyn bolamyz. Árıne, Qazaqstanda valıýta aıyrbastaý baǵamynyń erkin aınalymǵa kóshýin eskere kele, nesıelerdi valıýtamen, onyń ústine uzaq merzimge alýdyń úlken táýekel ekenin túsinemiz. Biz muny jasyrmaımyz. Biraq, biz bul táýekelge sanaly túrde bardyq Óıtkeni, jetistikterge toqmeıilsimeı, jańa bıikterge umtylýymyz qajet», - dep málimdedi ol.
Degenmen, aımaq basshysy buǵan qaramastan qalyptasqan jaǵdaıdy jan-jaqty baǵalaý qajettigin aıtty.
