Kósherbaev 20% bastapqy jarnasy bar salymshylar sanyn anyqtaýdy tapsyrdy
Sonymen birge ákim shaǵyn nesıelendirý maqsatynda oblysqa qosymsha qarjy tartýǵa tapsyrma berdi.
Aımaq basshysy Elbasynyń bes áleýmettik bastamasy mıllıondaǵan qazaqstandyqtardyń múddesine oń áser etip, áleýmettik salany jaqsartýǵa baǵyttalǵanyn atap ótti.
«Prezıdenttiń aıtýynsha, jumys isteıtin árbir qazaqstandyq jańalanǵan sharttar boıynsha ıpotekalyq nesıe alý múmkindigine ıe bolady. Budan basqa, ózderińiz bilesizder, biz aldymyzǵa oblystyń áleýmettik az qamtylǵan tobyn meılinshe qoljetimdi baspanamen qamtamasyz etý mindetin qoıyp otyrmyz. Osy maqsatta 2017 jyly 3 jylǵa arnalǵan turǵyn úı qurylysyna baǵyttalǵan «Orda» «jol kartasyn» ázirledik»,- dedi oblys ákimi.
Sondaı-aq, ol bastapqy jarna retinde esepshotynda 20% qarjysy jınaqtalǵandardyń sanyn anyqtaý úshin salymshylarǵa taldaý jasaýdy júktedi.
«Joǵary bilim alýdyń qoljetimdiligi men sapasyn arttyrý» atty Úshinshi bastamasy aıasynda Qyrymbek Kósherbaev Qyzylordadaǵy mektep bitirýshilerdiń Reseı Úkimetiniń granty esebinen bilim alyp jatqanyn atap ótti.
«Jýyrda Reseı Federatsııasynyń federaldyq bıýdjeti esebinen Reseı memlekettik agrarlyq ýnıversıtetiniń K.A.Tımırıazov atyndaǵy Máskeý aýylsharýashylyq akademııasyna bakalavr baǵdarlamasymen «Bilim salasyndaǵy aqparattyq júıeler» mamandyǵyna segiz talapkerdi jáne magıstratýra baǵdarlamasy boıynsha «Injenerlik bilim berý júıesin aqparattandyrý» mamandyǵyna jıyrma talapkerdi jańadan oqýǵa qabyldaý jóninde kelisimge qol jetkizdik. Sonymen birge, jyl saıyn oblys ákiminiń grantymen az qamtylǵan jáne kópbalaly otbasylardan shyqqan 100-ge jýyq daryndy aýyl balalaryn aımaqqa qajetti mamandyqtar boıynsha elimizdiń jetekshi joǵary oqý oryndaryna jiberýdemiz. Bizdiń jastarymyz talantty jáne biz olardy jańa qoǵamnyń qajetti mamandyqtaryna baǵyttaýymyz qajet»,-dedi oblys ákimi.
Sondaı-aq, bıylǵy jyly shaǵyn nesıelendirýge 3 mlrd teńgeden astam qarjyny baǵyttaý josparlanýda. Bul keminde 500-ge jýyq jobany nesıelendirýge múmkindik beredi.
Astana qalasynyń gazdandyrý jónindegi Besinshi bastamasy aıasynda Memleket basshysy Qaraózek (Qyzylorda oblysy) - Jezqazǵan - Qaraǵandy - Temirtaý - Astana baǵytyndaǵy magıstraldy gaz qubyryn salý jobasyn júzege asyrýdy usyndy. Qyzylorda oblysy ákiminiń aıtýynsha, bul joba birneshe jyl boıy zertteldi.
«Búgingi kúni elordamyz Astanany gazdandyrý bizdiń Syr óńirinen bastaý alatyny biz úshin úlken qýanysh. Biz bul máseleni birneshe jyl zerttedik. Naqty aıtar bolsaq, bul - smetalyq quny 370 mlrd teńge bolatyn ınvestıtsııa, bıýdjetke túsetin túsimder men eń bastysy, jańa jumys oryndary. Joba boıynsha keminde 200 qyzylordalyq jumyspen qamtylatyn bolady», - dedi Qyrymbek Kósherbaev.
