Kósheni shańǵa toltyrǵan rýdnyılyq kásiporyn qarajatynan qaǵyldy
Kommýnaldyq kásiporynnyń teris áreketi Rýdnyı qalasynyń turǵyny Aleksandr Pavlovtyń beınetirkegishine túsip qalǵan. Ol atalǵan beınejazbany «Vkontakte» áleýmettik jelisine jarııalaǵan. Muny baıqaǵan qoǵam belsendisi Jan Botanov oblys ákiminiń jeke blogyna hat jazǵan-dy.
«Qostanaı oblysy. Rýdnyı qalasy, 7 sáýir, 2019 jyl, saǵat 22:30-da Rýdnyı qalasynyń mýnıtsıpaldy qyzmetteri kóshe tazartqan syńaı tanytyp, traktor kósheni shańǵa orap keledi. Sonyń kesirinen turǵyndar, páter ishindegiler taza aýamen demala almaı otyr! Aýmaqtaǵy ǵımarattarǵa da shań-tozań kirdi. Jınaý jumystary formaldy túrde júrgiziledi, biraq bul úshin qazynadan aqsha jumsalady. Salǵyrttyqqa jaýapty laýazymdy tulǵalardyń sybaılas jemqorlyqqa qatysy bar degen kúdik paıda boldy»,- dep jazady J. Botanov.
Qoǵam belsendisiniń hatyna oblys ákimi Arhımed Muhambetov birden jaýap qatqan.
«Shynynda da, «Rahat-2018» JShS qyzmetkerleri smeta boıynsha aldyn ala ylǵaldanýsyz jol jabyndaryn tazalaý jumystaryn júrgizdi. Alda osyndaı faktilerdi boldyrmaý maqsatynda, sondaı-aq tıisti sharalardy qabyldaý úshin Rýdnyı qalasynyń ákimdiginde osy JShS basshysynyń qatysýymen keńes ótkizildi. Merdiger tarapynan sharttyń buzylýyna baılanysty tehnologııany saqtamaı júrgizilgen jumystar úshin qarajat tólenbeıdi degen sheshim qabyldandy», - delingen oblys ákiminiń jaýap hatynda.
Sonymen qatar, Arhımed Muhambetov 2019 jyldyń 11 sáýirinen bastap Rýdnyı qalasynda aýmaqty sanıtarlyq tazalaý boıynsha jumystar júrgizilip jatqanyn aıtyp, oǵan qatysýǵa qala turǵyndary men uıymdardy shaqyrdy.
