Kóshelerge esimi beriletin 502 soǵys ardageriniń 30%-ǵa jýyǵy – qyzylordalyq

QYZYLORDA. KAZINFORM – Qyzylorda oblysynda Ekinshi dúnıejúzilik soǵys ardagerleriniń esimin kóshelerge berý jumysy arnaıy algorıtmge sáıkes atqarylyp jatyr. Bul týraly oblystyq Qoǵamdyq damý basqarmasynan habarlady.

Qaharman qazaqstandyqtardyń esimin ulyqtaý Jeńistiń 80 jyldyǵyna daıyndyq josparynda qamtylǵan. Mádenıet jáne aqparat mınıstrligine berilgen usynysta bir nemese odan kóp ordeni bar ardagerler eskerildi.

– Árbir kent, aýyldyq okrýg, qala, aýdan ákimdikterine osy baǵytta túsken aryzdar saraptalyp, krıterııge sáıkes tizim jasaldy. Qujattar jınaqtaldy. Sondaı-aq arhıvter men qorǵanys basqarmalarynan anyqtamalar alyndy, - dedi basqarma basshysy Rýslan Qaıýpov.

Elimiz boıynsha 502 soǵys ardageriniń esimin ulyqtaýǵa ruqsat berilse, sonyń 146-sy, ıaǵnı 30%-ǵa jýyǵy – qyzylordalyq.

– Memleket basshysynyń onomastıka salasyn ortalyqtandyrý tapsyrmasyna sáıkes birqatar zańnamaǵa ózgeris engizilgeni belgili. Soǵan baılanysty aýdandyq mańyzy bar Aral jáne Qazaly qalalarynyń kóshelerine ataý berý týraly usynystar aldymen oblystyq onomastıka komıssııasynda qaralady. Sosyn respýblıkalyq onomastıka komıssııasynyń kelisimin alý úshin joldanady. Usynystar tıisti onomastıka komıssııalarynda qaralyp, qorytyndy berilgesin sheshim jobalary jergilikti basylymdarda, ákimdikterdiń ınternet-resýrstarynda jarııalanady, – dedi Rýslan Qaıýpov.

Óńirde kóshege ataý berý jumysy bekitilgen ádistemeler men jol kartalaryna sáıkes júrgizilip jatyr.

Buǵan deıin biz bıyl jyl sońyna deıin Túrkistan oblysynda 47 kóshege maıdangerlerdiń aty beriletinin habarlaǵan bolatynbyz.