Kóshelerdegi 145 myń beınekamera ІІM júıesimen ıntegratsııalandy

NUR-SULTAN. QazAqparat – QR Іshki ister mınıstrligi aqparattandyrý jáne baılanys departamentiniń bas mamany Ádil Sársenov salany tsıfrlandyrý qalı júrip jatqany jaıly málimet berdi, dep habarlaıdy QazAqparat tilshisi.

«Memleket basshysynyń Іshki ister mınıstrliginiń «Halyq únine qulaq asatyn memleket» tujyrymdamasyn ázirleý tapsyrmasy negizinde «Kilemdi jabyn» jobasy qolǵa alyndy. Bul óńirlik jedel basqarý ortalyqtarynyń beınebaqylaý júıesine bógde beınekameralardy ıntegratsııalaýǵa baǵyttalǵan.

Qazir elimiz boıynsha ártúrli menshik nysanyndaǵy 687 myńnan astam beınebaqylaý kamerasy bar. Olardyń 145 myńǵa jýyǵy aýmaqtyq bólimshelerdiń jedel basqarý ortalyqtaryna engizilgen», - dedi ІІM ókili onlaın brıfıngide.

Sondaı-aq, ol salany tsıfrlandyrý aıasynda «Jappaı beınebaqylaý» jáne «Tsıfrlyq polıtseı» jobalary qolǵa alynǵanyn jetkizdi.

«Qazir polıtsııanyń qyzmettik kabınetteri men arnaıy mekemelerde 18 myńnan astam beınekamera ornatylǵan. «Tsıfrlyq polıtseı» - polıtsııa qyzmetkerlerin oqıǵalardy onlaın translıatsııalaý arqyly beınetirkegishtermen jáne quqyq qorǵaý organdarynyń arnaıy derekqorlary men aqparattyq júıelerine qosylǵan planshettik qurylǵylarmen jaraqtandyrý.

Búginde syrtqy qyzmet polıtseıleri 100% qyzmettik planshetpen jabdyqtalǵan. Onlaın translıatsııasy bar beınetirkegishti jáne GPS baqylaýdy engizý jobasy aprobatsııa satysynda jáne 150 beınetirkegishte testilik rejımde jumys isteıdi», - dedi Ádil Sársenov.