Kóshege túkirip, nasybaı atqandarǵa aıyppul salý qajet – saıasattanýshy
ASTANA. KAZINFORM – Jazýshy ári saıasattanýshy Baqytjan Buqarbaı qoǵamdyq oryndarda túkirip, nasybaı atqandarǵa qatań aıyppul salý qajet dep esepteıdi. Bul týraly ol Dala Podcast-qa bergen suhbatynda aıtty.
Onyń aıtýynsha, aıyppul qoǵamdyq tártipti saqtaýdyń álemniń kóptegen elinde qoldanylatyn tıimdi tetigi.
– Aıyppul tek Qazaqstannyń tájirıbesi emes. Sıngapýr dál osyndaı qatań tártiptiń arqasynda búgingi deńgeıge jetti. Onda eń tómengi aıyppul – 500 dollar. Tipti elge ashylmaǵan saǵyzdy da alyp kirýge bolmaıdy. Tapsa, aıyppul salady. Sonyń arqasynda tazalyq saqtalǵan, – dedi Baqytjan Buharbaı.
Onyń pikirinshe, qoǵamdyq oryndardaǵy tártipti sanaly túrde buzatyn adam aýyzsha eskertýden keıin óz minez-qulqyn ózgertpeıdi.
– Bir ret aıyppul tólep, onyń qolaısyzdyǵyn sezingen adam kelesi joly zań buzbaýǵa tyrysady. Mundaı tásil qoǵamdyq oryndarda bylapyt sóz aıtýǵa qatysty da qoldanylýy kerek, – dedi saıasattanýshy.
Baqytjan Buqarbaı sondaı-aq gadjetterge shamadan tys táýeldilik pen zeıinniń tómendeýi jas urpaqtyń tereń analıtıkalyq oılaý qabiletin álsiretetinin aıtty.
Budan bólek, ol áleýmettik jelilerde adamnyń qaıǵy-qasiretin kontent pen qarjylyq paıda tabý quralyna aınaldyrý qoǵamnyń oılaý júıesine keri áser etetinin atap ótti.
