Kóshege qoqys tastaǵan adam emespin - aýla sypyrýshy
AQTÓBE. QazAqparat - Jasy 50-den asqan Ábý Shegenov 20 jyldan astam ýaqyt boıy bir mekemede jumys isteıdi. Aýla sypyryp, tazalyqty qadaǵalaıtyn jumysshy ózi turatyn turǵyn úıdiń de bar sharýasyn tyńdyrady, dep habarlaıdy QazAqparat tilshisi.
Ábý Shegenov 30 jasynan bastap qara jumys istedi. Aqtóbedegi avtoparkte avtobýstardyń oryndaryn anyqtap, turaqty jerin belgilep bergen jumysshy keıin kúzetshi boldy. Jyldar ótip, aýla sypyrýshy qyzmetine aýysty. Qysy-jazy tynbaı eńbek etetin Ábý Shegenov tazalyqtyń qadirin biletin adam. Ol qala kóshesine qoqys tastamaǵan, júrgen jerin búldirmegen.
«Tańnan keshke deıin tazalyq jumystaryn júrgizemin. Sypyrǵysh, kúrek, arba qolymnan túspeıdi. Adamdar temekiniń tuqylyp, sýsynnyń qaldyǵyn tastap ketedi. Olar arnaıy jáshikke barýǵa erinip, kez kelgen jerge laqtyryp júre beredi. Bul mádenıetke jat qylyq. Biraq ony keıbir adam túsinedi, bir eskertýden keıin qaıtalamaıdy. Al keıbireýi uqpaıdy, ómirlik ustanymyn ózgertkisi kelmeıdi. Ózim tazalyqqa qushtarmyn. Úıimde de tazalyqtyń bolǵanyn qalaımyn. Únemi jan-jaǵymdy jınap, tazalap júremin»,- dedi Ábý Shegenov.
Jumysshy tań qylań bere uıqydan turyp, aldymen ózi turatyn kópqabatty úıdiń aýlasyn tazalaıdy. Túni boıy jınalǵan qoqysty arnaıy jáshikterge jınap, keıin turaqty jumysyna kirisedi. Munda da sol jumys daıyn tur.
«Men ózim turatyn úıdiń aýlasyn tazalaımyn. Aıyna 3-6 myń teńge beredi. Sypyrý, qoqystardy jınaý ol jumys, bir jaǵynan adam úshin jaqsy áser qaldyrady. Qonaqqa kelgen adamdardan uıalmaımyz, aýlamyzdy taza ustaımyz. Ári ózim jasyl jelekti jaqsy kóremin. Aldymen jumys isteıtin mekemege tal otyrǵyzyp, keıin ósip shyqqasyn jas shybyqty úıdiń aýlasyna ektim. Balalar syndyrady, biraq keıbiri ósip shyqty. Jazda aptasyna 1-2 ret sýaryp turamyn. Jazda gúl de ektim. Áli de kógaldandyrý jumystaryn júrgizemin. Munyń bári jaqsy ádet. Balama da osy joldy aıtyp, únemi tazalyqqa shaqyryp otyramyn»,- dedi aýla sypyrýshy.
Ábý Shegenov Aqtóbege Qaraqalpaqstannan qonys aýdarǵan. Bir ul tárbıelep ósirdi, taıaýda úılendirdi. Ózi fýtbol qaraǵandy unatady. Jaz aıynda Qobylandy batyr atyndaǵy ortalyq stadıonǵa baryp, «Aqtóbe» fýtbol komandasynyń oıyndaryn tamashalaıdy. Ári kúndelikti jańalyqtardy qalt jibermeıdi, qajetti aqparatty ınternetten qarap alady. Aýla sypyrýshy úshin erteńgi aýa raıy asa mańyzdy.
«Biz úshin ınternette qyzyq kóp. Aspan deneleri týraly oqyp, tanymymdy keńeıtemin. Planetalar, asteroıdtarty oqý, olardyń tirshiligin bilý, jańa qubylystar, tylsym dúnıelerdiń bári mańyzdy. Men olar týraly jan-jaqty aqparat alyp, keıin olardy janymdaǵy joldastaryma aıtyp beremin»,- dedi ol.
