Kóshedegi saýda úshin jalǵa berilgen ýchaskelerden 534,4 mln teńge tabys túsken

ASTANA. QazAqparat – «1000 oryn – kóshe saýdasy» baǵdarlamasy áleýmettik mańyzǵa ıe. Elorda maslıhatynda ótken turaqty komıssııanyń otyrysynda «Astana» áleýmettik-kásipkerlik korporatsııasynyń basqarma tóraǵasy Erkeǵalı Álimqulov osylaı málim etti, dep habarlaıdy QazAqparat tilshisi.

Depýtattyq korpýs aldynda baıandama jasaǵan Erkeǵalı Álimqulov 2016 jyly qabyldanǵan «1000 oryn – kóshe saýdasy» baǵdarlamasyn iske asyrýdaǵy nátıjelerge toqtaldy.

«1700-den astam jumys orny quryldy, bıýdjetke salyq aýdarymdarynyń turaqty túsý kórsetkishi artty. Baǵdarlama zańsyz stıhııalyq saýdamen kúresýdiń, shaǵyn bıznesti, atap aıtqanda otbasylyq bıznesti qoldaýdyń ádisteriniń biri bolyp tabylady. 2019 jyly «Atameken» palatasymen birlesip, baǵdarlama áleýmettik mańyzǵa ıe boldy. Osynyń negizinde halyqtyń áleýmettik osal toptaryna jer telimderi berilip keledi», - dedi Erkeǵalı Álimqulov.

ÁKK-niń basshysy 2019 jyldan bastap ýchaskelerdi alýǵa arnalǵan saýda-sattyq onlaın formatta «www.gosreestr.kz» portalynda ótkiziletinin atap ótti. Al qujattardy qabyldaý «i-Qala» platformasynda júrgiziledi. Kásipkerlerge qandaı da bir organǵa baryp, qaǵaz júzindegi qujattardy tapsyrýdyń qajeti joq.

«Baǵdarlamany iske asyrý kezeńderindegi jer ýchaskelerin jalǵa berýden túsken jalpy tabys – 534,4 mln teńge. Atap aıtqanda, 2017 jyly – 27,8 mln, 2018 jyly – 102,1 mln, 2019 jyly – 112 mln, 2020 jyly – 72,5 mln, 2021 jyly – 142 mln jáne 2022 jyldyń 9 aıynda – 97 mln teńge tabys tústi», - dep atap ótti Erkeǵalı Álimqulov.

Buǵan deıin habarlaǵanymyzdaı, kóshe saýdasymen aınalysý úshin Astanadaǵy bıznes sýbektilerine 596 jer ýchaskesi jalǵa berilgen.