Kóshedegi LED-dıspleı Almaty júrgizýshilerine kedergi jasap otyr

ALMATY. QazAqparat – Almaty bıligi jol apatyna ákep soqtyrýy yqtımal kóshe ekrandaryn azaıtýdy qolǵa aldy, dep habarlaıdy QazAqparat tilshisi.

Atap aıtqanda, Open Almaty qoǵamdyq qabyldaýyna júrgizýshilerden kóp shaǵym túsken. Qaladaǵy 18 LED-dıspleı júrgizýshilerdiń kózin qaryqtyryp, jol júrýine kedergi keltiretin bolyp shyqty.

«Vision Zero Almaty jol qaýipsizdigi kontseptsııasynyń aıasynda Almaty kólik holdıngi 10 dıspleıdi ózderi óshirdi. Bul jumystar túnde júrgizilip jatyr. Sebebi, ekrandardy óshirý úshin kúndiz joldardy jabýǵa týra keledi. LED-ekrandaǵy sýretter júrgizýshilerdiń nazaryn aýdarady. Sonymen qatar, keıbir konstrýktsııalardyń ornalasý bıiktigi jol qozǵalysy qaýipsizdigi talaptaryna saı kelmeıdi», - dedi ákimdiktiń baspasóz qyzmetinen.