Kóshedegi valıýta baǵamyn kórsetetin kestelerge tyıym salý sharasy 2 aılyq synaqtan ótedi
ASTANA. KAZINFORM – Ulttyq bank kóshedegi valıýta baǵamy kórsetilgen kestelerge tyıym salý týraly qaýlyny maýsym aıynda qabyldaýdy josparlap otyr. Alaıda naryq jańa sheshimge ábden boı úıretý úshin tamyz aıyna deıingi kezeńdi ótpeli merzim etip belgilemek.
- Qaýly jobasy ashyq normatıvtik quqyqtyq aktiler ınternet portalyna jarııalanyp, kópshiliktiń talqysynan ótti. Qazir joba Ádilet mınıstrliginiń qaraýynda jatyr.
Jobany bıylǵy maýsymda qabyldaý josparda bar. Oǵan naryq qatysýshylarynyń jumysyn beıimdeý úshin 2025 jylǵy tamyz aıyna deıin ótpeli kezeń qarastyrylǵan. Joba elimizdegi aıyrbastaý pýnkteriniń jalpy sanyna áser etken joq, - dep jazylǵan Kazinform saýalyna joldanǵan jaýapta.
«Ashyq NQA» portalyndaǵy talqylaý kezinde qaýly jobasyna qarsy pikirler men ótinishter de túsipti.
- 05.05.2025 j. jaǵdaı boıynsha «E-Ótinish» aqparattyq júıesi arqyly zańdy tulǵalardan túsken 2 ótinish qaraldy. Sonymen qatar ashyq normatıvtik quqyqtyq aktiler portalyna 10 pikir jazylǵan: onyń 6-yn– jeke tulǵalar, 4-in zańdy tulǵalar jazǵan, - dep jazady Ulttyq banktegiler.
Eske salsaq, Ulttyq bank tóraǵasy Tımýr Súleımenov kóshedegi valıýta baǵamynyń kestelerin ilýge nege tyıym salyp jatqandaryn túsindirgen bolatyn.