Kóshede volonterlerdiń qaıyrymdylyqqa aqsha jınaýy zańdy ma – mınıstrlik jaýaby
Búgin elordada ótken Ortalyq Azııa volonterleri forýmy barysynda QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet qaıyrymdylyqty arqaý etip, Nur-Sultan qalasy kóshelerinde jaz boıy adamdardan aqsha jınaıtyn jasóspirimder men jastardyń qyzmetine qatysty pikir bildirdi.
Komıtet basshysy atalǵan máseleden habardar ekenin atap ótti.
«Bıyl shildede Memleket basshysy ózgerister men tolyqtyrýlar engizilgen volonterlik jáne qaıyrymdylyqpen aınalysý týraly zańǵa qol qoıdy. Zań aıasynda qaıyrymdylyqpen aınalysatyn uıymdar men volonterlerdiń mártebesi resmı bekitildi. Endigi ýaqytta olar arnaıy kelisimshartpen jumys isteýi kerek. Ol qujat volonterlerdi, qaıyrymdylyqpen aınalysatyn uıymdardyń qyzmetin jáne kómek alyp jatqan jandardy qorǵaıdy», - dedi Madııar Qojahmet tilshilerdiń suraǵyna jaýap bere turyp.
Onyń aıtýynsha, jańa zańǵa sáıkes volonter kámelet jasynda bolýy tıis.
«Sonymen qatar jergilikti ákimdiktermen jáne Polıtsııa departamentimen birlesip, volonterler men salalyq uıymdar arasynda túsindirý jumysyn júrgizip jatyrmyz. Birinshiden, kóshede ózdiginen aqsha jınap júrgen jasóspirim volonterler tegin jumys istemeıdi. Buny volonterlik dep sanaýǵa bolmaıdy. Sebebi olar qyzmet kórsetedi jáne ol úshin aqy alady. Taǵy bir mańyzdy jaıt, volonter jasóspirimderdiń ata-anasy ruqsatynyń bolýy. Endi biz osy atalǵan máselelerge baqylaý ornatýymyz kerek. Maqsat – volonterlik qyzmettiń zań aıasynda júzege asýy. Bizdiń oıymyzsha kóshede qaıyrymdylyq maqsatynda aqsha jınaý tendentsııasy toqtaý qajet», - deıdi ol.
Aıta ketsek, búgin elordada Ortalyq Azııa elderi volonterleriniń forýmy ótti.
Sondaı-aq atalǵan shara barysynda qyrkúıekte kúshine enetin volonterlik týraly zańnyń oryndalýyna monıtorıng júrgiziletini týraly aıtyldy.
