Kóshede sebepsiz júrgen aqtóbelik bes táýlikke qamaldy
AQTÓBE. QazAqparat - Aqtóbe oblysynda tótenshe jaǵdaı rejımin buzǵan 267 derek tirkeldi, dep habarlaıdy QazAqparat tilshisi.
Polıtsııa qyzmetkerleri eriktilermen birge kóshede karantın erejesiniń saqtalýyn baqylap júr. ÁQBtK «TJ rejımin buzý» baby boıynsha 62 adam qamaldy. Sonymen birge 113 adamǵa aıyppul salyndy. Kodekstiń «TJ jaǵdaıynda quqyq tártibin buzýǵa ıtermeleıtin is-áreketter» baby boıynsha 25 quqyqbuzýshylyq anyqtaldy. Onyń ishinde 14 aıyppul salynyp, 10 adam qamaýǵa alyndy.
«Ózi Nur-Aqtóbe yqsham aýdanynda turady, biraq qalanyń ortalyq kóshesinde júr. Polıtsııa 44 jastaǵy er adamdy toqtatyp, QR ÁQBtK «TJ rejımin buzý» baby boıynsha 5 táýlikke ákimshilik qamaýǵa aldy. Sonymen birge óńirde mas kúıinde kólik júrgizgender anyqtaldy. Aqtóbe oblysynda 48 fakti tirkeldi. Júrgizýshi kýáliginen aıyrylǵan bes adam taǵy mas kúıinde ustaldy. Keıbiri jol-kólik oqıǵasyna sebep boldy. Mysaly, bir aqtóbelik kólik quralyn alkogoldik masań kúıde júrgizgeni úshin eki jylǵa bas bostandyǵynan jáne ómir boıy júrgizýshi quqyǵynan aıyrylyp, sottaldy. Taǵy bireýi esirtki tutynǵan. Ol da 3 jylǵa bas bostandyǵynan aıyryldy», - dedi oblystyq PD baspasóz qyzmetiniń jetekshisi Erbolat Sarqulov.
Oblystyq polıtsııa departamenti bıyldan bastap kólik quralyn mas kúıinde júrgizgeni úshin jaýapkershilikti kúsheıgenin eske salady.
