Kóshede pırotehnıka atqandar 21 myń teńge aıyppul tóleıdi
QYZYLORDA. QazAqparat- Qyzylorda oblysy aýmaǵynda Ákimshilik polıtsııa basqarmasy men aımaqtyq tótenshe jaǵdaılar departamentiniń órtke qarsy qyzmet bólinisteri «Pırotehnıka» jedel-aldyn alý is-sharasyn bastady, dep habarlady «QazAqparat» HAA tilshisi OІІD silteme jasap.
Sharanyń basty maqsaty - zańdy jáne jeke tulǵalardyń pırotehnıkalyq ónimderdi saqtaý, esepke alý, qoldaný, satyp alý, tasymaldaý tártibiniń saqtalýyn tekserý, sertıfıkattalmaǵan ónimdi jetkizýshilerdi anyqtaý, qoǵamdyq oryndar men kóshelerde, turǵyn úılerde osy ónimderdiń saldarynan bolatyn tótenshe jaǵdaılardyń aldyn alý.
Pırotehnıkalyq buıymdar saldarynan dene jaraqattaryn boldyrmaý, olardy halyq kóp shoǵyrlanatyn jerlerde paıdalanýdyń jolyn kesý maqsatynda polıtsııa jasaqtarynyń, ýchaskelik polıtsııa ınspektorlarynyń, mektep ınspektorlarynyń qatysýymen reıdtik sharalar uıymdastyrylýda.
Osy oraıda, tártip saqshylary eldi mekenderde jáne bul úshin bólinbegen oryndarda arnaıy jáne qoldan jasalǵan pırotehnıkalardy jarý oryn alǵan jaǵdaıda, qurylǵy tárkilenip, al onyń ıesine QR ÁQBtK-niń 436-babynyń 2-bóligine sáıkes, 10 aılyq eseptik kórsetkish kóleminde aıyppul salynatynyn eskertedi.
Sondaı-aq, pırotehnıkalyq zattardy jáne qoldan jasalatyn buıymdardy saqtaý, esepke alý, paıdalaný, tasymaldaý, olardy satý, joıý, ákelý jáne áketý tártibin buzǵan tulǵalarǵa QR Ákimshilik quqyqbuzýshylyq týraly kodeksiniń 483-baby 1-bóligi boıynsha jeke tulǵalarǵa -5, shaǵyn kásipkerlik sýbektilerine nemese kommertsııalyq emes uıymdarǵa -10, orta kásipkerlik sýbektilerine - 15, iri kásipkerlik sýbektilerine - 45 aılyq eseptik kórsetkish mólsherinde aıyppul salynady.
«Budan bólek, erkin saýda jasaýǵa Qazaqstan Respýblıkasynyń zańnamasymen tyıym salynǵan nemese shektelgen taýarlar men zattardy satý QR ÁQBtK-niń 196-babyna sáıkes, 25 aılyq eseptik kórsetkish mólsherinde aıyppul salýǵa ákelip soǵatynyn eskertemiz», - delingen habarlamada.
