Kóshede ketip bara jatqan adam 10 jasar balany órtten qutqaryp qaldy
PETROPAVL. QazAqparat - Petropavl turǵyny Rýslan Tıýmenev jetkinshekti janyp jatqan páterden alyp shyqty, dep habarlaıdy QazAqparat tilshisi.
Tótenshe jaǵdaılar departamenti baspasóz qyzmetiniń deregi boıynsha, Rýslan Tıýmenev jumystan qaıtyp kele jatyp, balalardyń kómek surap jylaǵan daýysyn estigen. Jan-jaǵyna qarasa, 5 qabatty turǵyn úıdegi páterdiń balkony janyp jatyr eken.
«Balalar qulyptanyp qaldy dep oılap, turǵyn úıdiń kireberisine júgirdim. Esik ashyq turdy. Janymda taǵy bir adam boldy, sonymen birge tútinge oranǵan páterge kirip, telefonnyń qol shamyn qosyp, izdeı bastadyq. Eshteńe kóringenbeıdi, biz balanyń aıqaıy shyqqan jaqqa qaraı bardyq. Sóıtip, qorqyp qalǵan ul balany kóshege alyp shyqtyq», - dedi R.Tıýmenev.
10 jasar bala órt kezinde bólmesinde otyryp, sabaǵyn oqı bergen. Ol úıdiń órtke oranyp jatqanyn bilmeı qalǵan. Rýslannyń arqasynda aman qalyp, oblystyq balalar aýrýhanasyna jetkizildi. Búldirshin din-aman, úıine qaıtaryldy.
«Órt sóndirýshiler oqıǵa ornyna kelgen kezde bes qabatty turǵyn úıdiń balkony janyp jatqanyn kórgen. Olar órt páterge jaıylmas úshin statsıonarlyq lafettik oqpan qoldandy. Onyń kómegimen órt aýyzdyqtalyp, shatyr salqyndatylǵan. Sol arqyly órt ári qaraı jaıylǵan joq», - dedi baspasóz qyzmetinen.
Úıden 23 adam, sonyń ishinde úsh bala evakýatsııalandy.
