Kóshede esirtki alyp bara jatqan adam ustaldy - BQO
ORAL. QazAqparat – Oralda Ulttyq ulan jaýyngerleri ıisshil ıttiń kómegimen nashaqor men sýyq qarýmen júrgen er adamdy ustady, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵy baspasóz qyzmetiniń jetekshisi Erbolat Sultanovtyń aıtýynsha, oqıǵa 14 tamyz kúni keshkisin bolǵan.
Saǵat 18.45 shamasynda quramynda kishi serjant Qajymuqan Muńaıtpashev, qatardaǵy jaýyngerler Qaırat Súıenshıev, Bekzat Jubanyshpaev jáne kınolog, kishi serjant Erǵalı Ernar bar top Jambyl kóshesinde júrgen kúdikti adamdardy baıqaıdy. Saqshylardy kórgen olardyń biri belgisiz zatty laqtyryp jiberedi.
«Remmı» esimdi ıisshil ıttiń kómegimen sol mańdy qaraǵan jaýyngerler qoldan jasalǵan pyshaqty taýyp aldy. Sýyq qarý Oral qalasynyń 49 jastaǵy turǵynyna tıesili bolyp shyqty.
Sol kúni saǵat 21.00 shamasynda Balashov kóshesi boıyndaǵy garajdar janynda er adam jaýyngerlerdi kórip, belgisiz zatty butalardyń arasyna laqtyrady. Sanaýly mınýttar ishinde taǵy da «Remmıdiń» kómegimen qaǵazǵa oralǵan marıhýana tabyldy.
Eki quqyq buzýshy da odan ári tekserý úshin polıtsııa qyzmetkerlerine tapsyryldy.
Qyraǵylyǵy men kásibı is-qımyldary úshin atalǵan top 5517-áskerı bólim komandırimen yntalandyryldy.
Eske sala keteıik, budan buryn Oralda terekke júrektiń sýretin oıyp salǵan jigitke aıyppul salynǵanyn jazǵan bolatynbyz.
