Kóshede esinen tanǵan elorda turǵynyn tonap ketken
NUR-SULTAN. QazAqparat – Elordada kóshede esinen tanyp qalǵan er adamdy tonap ketken. Bul týraly Nur-Sultan qalalyq Polıtsııa departamentinen málim etti, dep habarlaıdy QazAqparat tilshisi.
«57 jastaǵy azamattyń aıtýynsha, ol Qarasaı kóshesimen temirjol vokzalyna qaraı jaıaý kele jatyp, garajdardyń janynda kenetten esinen tanǵan. Er adam neden esinen tanǵanyn esine túsire almady. Birshama ýaqyttan keıin esin jıǵan ol qasynda beıtanys eki adamnyń otyrǵanyn jáne qaltalaryn tintip jatqanyn kórgen. «Ne istep jatyrsyńdar?» degen saýalynan keıin kúdiktiler ony soqqyǵa jyqqan. Qaltasynan 30 myń teńge men usaq zattaryn alyp ketken. Tipti, zardap shegýshiniń shalbarynan beldigin jáne kózáınegin alyp ketýden de tartynbaǵan», - dedi departamentten.
Vedomstvo málimetinshe, polıtsııa qyzmetkerleri atalǵan qylmysty jasaý kúdigimen elordanyń 26 jáne 36 jastaǵy turǵyndaryn «izin sýytpaı» ustady. Ustalǵan kúdiktilerdiń buǵan deıin de sottalǵany jáne qylmystyq jaýapkershilikke tartylǵany anyqtaldy. Zattaı aıǵaqtar men aqsha qarajaty tárkilenip, zańdy ıesine qaıtaryldy. Kúdiktiler polıtsııa departamentiniń ýaqytsha oqshaýlaǵyshyna qamaldy.
«Atalǵan fakti boıynsha QR QK 191-babymen sotqa deıingi tergeý júrgizilip jatyr. Ustalǵan tulǵalardyń buǵan deıin elorda aýmaǵynda jasalǵan osyndaı qylmystarǵa qatysy tekserilip jatyr», - dedi polıtseıler.
