Kóshede azamattarǵa maskasyz júrgeni úshin aıyppul salǵan durys pa
Búgin Sybaılas jemqorlyqqa qarsy is-qımyl agenttiginde Rafael Gasanovtyń qatysýymen baspasóz máslıhaty ótti. Baspasóz máslıhaty barysynda spıkerge «Qazaqstannyń keıbir óńirinde mobıldi toptar (quramyndaǵy polıtsııa qyzmetkerleri arqyly) kóshede maskasyz júrgen azamattarǵa Ákimshilik kodekstiń 425-babyn negizge alyp, 40 myń teńgeden artyq aıyppul salǵan. Bul zańdy ma?» degen suraq qoıylǵan bolatyn.
Bul suraqqa jaýap bergen Rafael Gasanov eń aldymen eldegi búkil ákimdikterge úndeý joldady.
«Tyńdańyzdar! Jazalaýdan buryn preventsııaǵa jumys isteý kerek. Adamdarǵa aldymen túsindirgen abzal. Suraq durys qoıylyp otyr. Óz basym azamattarǵa jónsiz aıyppul salyna bermeýi kerek dep esepteımin. Halyq aldymen salyq tólep otyr. Sol salyqtan olar (ákimdik qyzmetkerleri) aılyq alady. ıAǵnı, halyqqa bas-kóz joq aıyppul sala bermeı, jadynamalardy taratyp, túsindirme jumystaryn kúsheıtken abzal. Bir sózben aqparattyq túsindirý jumysy jappaı júrgizilýi kerek. Aldymen túsinik jazdyrý kerek, bolmasa bir ret eskertý jasaǵan durys», - deıdi Rafael Gasanov.
Onyń aıtýynsha qoǵamda shynynda da tártipti óreskel buzatyndar bar. Rafael Gasanov sonymen qatar bul oqıǵalardyń zańdylyǵyn anyqtaýǵa ýáde berdi.
«Ózimiz de el ishin aralap júrmiz. Tártipti óreskel buzǵan azamat sol memlekettik qyzmetshiniń ózine de aryz jazýy múmkin. Osy kezde araǵa qoǵam ókilderi kirýi kerek. Bárimiz adambyz ǵoı. Solaı emes pe? Bul máseleniń kemshilikteri de, artyqshylyqtary da bar. Jazalaý ádisine salsaq, endeshe eldiń jartysyna aıyppul salaıyq. Bul aqymaqtyq bolar edi», - dedi Rafael Gasanov.