Kóshede aıý júrdi: ShQO-daǵy Serebrıansk qalasynyń turǵyndary aıý taǵy kele me dep úreılenedi

ÓSKEMEN. KAZINFORM – Shyǵys Qazaqstan oblysyndaǵy Serebrıansk qalasynyń turǵyndary aıý taǵy da kóshe ishine kirip kete me alańdap otyr.

19 tamyzda Serebrıansk qalasynyń ortalyǵynda emin-erkin aıý júrgen vıdeo áleýmettik jelide tarap ketken edi. 

Ákimdik sol kezde túz taǵysyn izdeýge polıtseıler men orman ınspektsııasy mamandary jumyldyrylǵanyn málimdegen. Olar kóp uzamaı tabylǵan aıýdy eldi mekennen basqa jaqqa shyǵaryp jiberdi.

Dese de qala halqy Ertistiń arǵy jaǵasynda aıýdyń kóp júrgenin aıtyp, túz taǵysy taǵy da kóshege kirip kete me dep qorqatyndyqtaryn aıtyp jatyr. Buǵan qatysty jergilikti ákimdikten jaýap berdi.

- Qazir turǵyndarǵa eshqandaı qaýip tónip turǵan joq. Aıýlar qala irgesinen alysta. Dese de jaǵdaı týraly jedel áreket etý toby habardar etilgen. Jaqyn arada ınspektorlar kelip, monıtorıng júrgizedi, - dep habarlady ákimdikten. 

Eske salsaq, osyǵan deıin Mańǵystaýda túıelerdi qaraqurt shaqqany habarlanǵan.