Kóshede aıý júr: ShQO-daǵy Serebrıansk qalasynyń turǵyndaryna eskertý jasaldy

ÓSKEMEN. KAZINFORM – Shyǵys Qazaqstan oblysyndaǵy Serebrıansk qalasynda aıý ortalyq alańǵa deıin kirip ketken.

Áleýmettik jelide aıýdyń Serebrıansk qalasynyń ortalyǵynda emin-erkin júrgen vıdeosy tarap ketti.

Qalalyq ákimdik vıdeonyń shynaıy ekenin rastady. Sol jerge jedel áreket etý toptary attanǵan. Olardan bólek, túz taǵysyn izdeýge polıtsııa men orman ınspektsııasy jumyldyryldy. Degenmen, aıý ázirge tabylmaı jatyr.

- Qazir biz birlesip aıýdy izdep jatyrmyz. Onyń qaıdan kelgenin naqty aıtý qıyn. Bir boljam boıynsha ózendi júzip ótken bolýy múmkin. Turǵyndardyń qaýipsizdigi úshin barlyq tıisti sharalar qabyldanǵan, - dedi Serebrıansk qalasy ákiminiń orynbasary Ksenııa Korotkova.

Onyń aıtýynsha, aıýdy tamyz aıynyń basynda qala mańynan kórgender de bolǵan. Biraq sol kezde ol ustatpaı ketti.

Osy rette, turǵyndarǵa qarańǵy ýaqytta dalaǵa shyqpaýǵa jáne balalardy qaraýsyz qaldyrmaýǵa keńes berildi.

Eske salsaq, osyǵan deıin Nıderlandyda qasqyr alty jastaǵy balaǵa shabýyl jasaǵany habarlanǵan.