Kóshede aıaǵyn syndyrǵan Petropavl turǵyny sot arqyly ákimdikten ótemaqy aldy
PETROPAVL. KAZINFORM – Petropavl turǵyny kóshedegi shuńqyrǵa qulap, aıaǵyn syndyrǵan eken.
Іs Petropavl qalasynyń №2 sotynda qaraldy. Talap qoıýshynyń aıtýynsha, oqıǵa byltyr tamyz aıynda qala kósheleriniń birinde bolǵan. Balasyn ertken áıel trotýarmen kele jatyp, abaısyzda joldyń shetine shyǵyp ketken. Shóptiń astynda qalǵan sý toly shuńqyrǵa denesiniń oń jaǵymen qulaǵan. Qaýipti ýchaskede eshqandaı eskertý belgileri bolmaǵan eken.
Sot materıaldaryna sáıkes, oqıǵa saldarynan áıeldiń taban súıegi synǵan. Saraptama qorytyndysyna sáıkes, ol orta dárejedegi dene jaraqaty dep tanyldy.
Jaraqat alǵannan keıin áıel uzaq ýaqyt emdelip, ýaqytsha eńbekke jaramsyz bolǵan. Sol sebepti aldymen sotqa deıingi tártippen qalalyq turǵyn úı-kommýnaldyq sharýashylyǵy bólimine júginedi. Memlekettik organ qaýipti shuńqyrdy kómip tastaǵanymen, óz kinásin moıyndamaı, áıelge moraldyq ótemaqy tóleýden bas tartqan.
Sot otyrysynda qalalyq ınfraqurylymdy qaýipsiz jaǵdaıda ustap turý mindeti tıisinshe oryndalmaǵan degen qorytyndy shyǵaryldy.
Nátıjesinde sot talap qoıýshynyń aryzyn qanaǵattandyryp, onyń paıdasyna moraldyq zııan ótemaqysy men sot shyǵyndaryn óndirý týraly sheshim shyǵardy. Apellıatsııalyq saty da bul sheshimdi ózgerissiz qaldyrdy.
Buǵan deıin Jetisý oblysynda polıtsııa qyzmetkerine qol kótergen turǵyn sottalǵanyn jazǵan edik.
