Kóshede, aýlalarda qoldan sút satyp alý qaýipti
ALMATY. Maýsymnyń 24-i. QazAqparat /Názıra Eleýhan/ - Búgin Almatyda Almaly aýdany ákimdigi, Sút odaǵy jáne sanıtarlyq-epıdemıologııalyq qadaǵalaý basqarmasy qala kósheleri men turǵyn úı aýlalarynda, belgilenbegen saýda oryndarynda "Sút tekserý" reıdin júrgizdi.
Uıymdastyrýshylardyń aıtýynsha, sharanyń maqsaty - halyqty «jabaıy» saýdanyń qaýpi týraly aqparattandyrý jáne onyń aldyn alý boıynsha jumystar júrgizip jatqan jergilikti atqarýshy bıliktiń isterimen tanystyrý.
Tekserý barysynda qoldaǵy sútterdiń qujattary, fermerlik sharýashylyqtyń, maldyń veterınarlyq anyqtama qaǵazy, súttiń satý kúninde berilgen sapa kýáligi, satýshynyń sanıtarlyq kitapshasy men arnaıy kıim kııýi, sondaı-aq saqtaý jaǵdaılarynyń (temperatýralyq rejım) qadaǵalanýy tekserildi.
Almaly aýdany ákimshiliginiń kásipkerlikti jáne ónerkásipti damytý jónindegi bólim bastyǵy Erbol Janseıitovtyń aıtýynsha, jyl basynan aýdan boıynsha - 158 nysan, jazǵy maýsym bastalǵannan beri - 34 erkin saýda núkteleri anyqtalyp, jabylǵan. Jyldyń basynan 520 hattama, jazǵy maýsym bastalǵannan beri - 33 hattama jasalǵan. «1 qańtardan bastap barlyǵy 105 tekserý, 1 maýsymnan bastap - 22 tekserý júrgizildi. Jyl basynan beri 1 306 833 teńge aıyppul alyndy», dedi ol. Onyń aıtýynsha, aýlalarda nemese kóshe boıynda qoldan sút saýdasy kezinde keń taralǵan buzýshylyq - veterınarlyq kýáliktiń joqtyǵy, ıaǵnı sharýashylyqtyń indetterden jáne brýtsellez, týberkýlez sııaqty asa qaýipti dertterden aman ekenin rastaıtyn qujattardyń, satýshynyń sanıtarlyq kitapshasynyń bolmaýy.
«Tutynýshy ónimniń qaýipsizdigi men onyń taǵamdyq qundylyǵynda senimdi bolýy úshin zerthanalyq zertteýler qajet, sol sebepti tehnıkalyq reglament, ıaǵnı súttiń barlyq óndirýshileri men satýshylaryna arnalǵan ereje qabyldanǵanyn tutynýshy bilýi tıis. Іndetti aýrýlardyń aldyn alý úshin sút sııaqty ónim pasterlenip, oramaǵa quıylýy qajet, ıaǵnı óńdeý satysynan ótip, saýda jelisi arqyly satylýy tıis», dep atap ótti Sút odaǵynyń atqarýshy dırektorynyń orynbasary Lıdııa Mıheeva. Ol tekserý barysynda Qazaqstan Respýblıkasynyń Ákimshilik quqyq buzýshylyq týraly kodeksiniń «Qoǵamdyq qaýipsizdikke jáne halyqtyń densaýlyǵyna qol suǵatyn ákimshilik quqyq buzýshylyq» týraly 21-shi taraýy tehnıkalyq reglamentterge sáıkes kelmeıtin ónimniń satylýyna tyıym salatyndyǵyn sút satýshylardyń esine saldy.
«Kóshede ashyq ydysta satylatyn sút óte qaýipti. Mundaı sútti úı jaǵdaıynda óńdeýden ótkizseńiz de, ony qoldaný qaýipsiz emes. Qaınatý arqyly keıbir mıkroorganızmderdi joıǵanyńyzben, altyn stafılokokk, ishek týberkýleziniń qozdyrýshysy sııaqty termoturaqty mıkroorganızmder saqtalady», - dep eskertti Almaly aýdanynyń sanıtarlyq-epıdemıologııalyq qadaǵalaý basqarmasynyń basshysy Merýert Qasymova.
