Kóshe tazalaıtyn maman: Kólik ıesiniń ne oılap bara jatqanyn qabaǵynan oqyp otyram
ASTANA. QazAqparat – «Maman monology» aıdarynyń bul jolǵy keıipkeri – Qýanysh Eltaev. Astana kósheleriniń shańyn basý úshin sý shashyp júretin kólikti tizgindegenine 10 jyldan asypty. Qysta bul kólikter tumsyǵyna kúrek ornatyp, qarmen arpalysady. «Jumystyń ońaıy joq» qaǵıdasyn ustanatyn keıipkerimiz eti úırenip, aıaq-qoly mashyqqan jumysyn basqa jumysqa aıyrbastaýdy oılamaıtynyn aıtady. Basqa aıtqandaryn óz aýzynan usynyp otyrmyz.
Qýanysh Eltaev, «Astana Tazalyq» JShS-niń arnaıy tehnıka júrgizýshisi:
Men bul mekemede arnaıy tehnıka aıdaımyn. Ol kólikke qysta qar kúreıtin kúrek, jazda sý shashatyn sebezgi qural ornatylady. Keıbir tanystar ázildep, keıbiri shyndap surap jatady: «Kósheni jýǵanda qandaı sabyn qosasyńdar?», - dep. Biz kóshe jýmaımyz. Ol – basqa tehnıka. Bizdiki qalanyń shańyn basý úshin tehnıkalyq sý sebý ǵana.
... 2009 jyldan beri osy mekemede jumys istep júrmin. «Qala tazalyǵyna jaýapty orynǵa jumysshy alyp jatyr» degen habarlama boıynsha kelgen edim. Sodan beri taban aýdarǵan joqpyn. Áýeli mehanızator bolyp kirgenmin. Keıin osy kólikke aýystym.
...Bir qaraǵan adamǵa kólik kabınasynda otyryp, kerekti tetikti qozǵap qana sý seýip shyǵý ońaı jumys sııaqty kórinýi múmkin. Biraq jumystyń ońaıy bolmaıtynyn eńbek etip kórgen adamnyń bári biletin shyǵar. Bizge óte muqııat bolý kerek. Sý seýip kele jatqanda artyna qaramastan, alańsyz ketip bara jatqan júrginshiler shyǵady. Ústine sý shashyramas úshin sıgnal berip, nazaryn aýdartamyz degen sııaqty. Kóligin jańa ǵana jýdyryp shyqqan keıbir júrgizýshiler biz janynan sý shashyp ótkende qynjylǵanyn qaraǵan qabaǵynan kórip qalamyz. Sýmen birge kólikke usaq tastar shashyraýy múmkin. Ony da qaperde ustaý qajet. Muqııat bolýymyz kerek degenim sol.
...Qysta kóligime kúrek ornatady. Ol jumystyń óz qıyndyqtary bar. Biraq jazda jumys ońaılap, qysta qıyndaıdy dep aıtpas edim. Jazdaǵy jumys pen qystaǵy jumystyń esh aıyrmashylyǵy joq. Kósheniń boıyna qańtarylǵan kólik qysta qandaı kedergi keltirse, jazda da solaı jumysty qıyndatady. Jalǵyz aıyrmashylyq bar shyǵar. Jazda kúnge kúıip, «zagar alamyz». Al qysta tońamyz. Aıyrmashylyǵy sol ǵana.
...Aılyq máselesi bizde jumys istegen ýaqytqa baılanysty. Aýysymǵa neǵurlym jıi shyqsaq, tabys soǵurlym kóbirek bolady. Kimniń densaýlyǵy myqty, otbasylyq jaǵdaıy ońtaıly, ýaqyty mol bolsa, sol kóbirek shyǵady degendeı ǵoı.
...Ujymda jastar azdaý. Kóbinese orta jastaǵy adamdar jınalǵanbyz. Jas degenderiń ózi 30-dan asqandar.
...Astanalyqtarǵa bizdiń jumysymyzǵa túsinýshilikpen qarasańyzdar deýshi edim. Ne istesek te, qalanyń tazalyǵy úshin, turǵyndarǵa qolaıly bolý úshin isteımiz. Qysta jol boıyna kólik tastaıtyndar kóbeıedi. Sonyń saldaryn oılasa eken deımiz.
...Qar saǵattap, táýliktep jaýǵan kezde jumysqa syn aıtýshylar kóbeıedi. Biraq tolassyz jaýǵan qarmen arpalysý ońaı emes. Jańa ǵana kúrep ketken jerińdi qaıtadan basyp tastaıdy. Qysta toqtaýsyz jumys isteıtin kezeńder jıi bolady. Jalpy qysta jumys mazasyz bolyp ketedi.
Ondaı kezderde osy jumystan ketý kerek dep jatatyn áriptesterim bolady. Ol sózder bizge de oı salady. Biraq adamnyń oıy qubylmaly ǵoı. Júre beresiń. Basqa jerge barǵanda da bári bir sondaı jumys isteısiz.
