Kóshe saýdasy úshin elordalyq kásipkerlerge 596 jer ýchaskesi berildi

ASTANA. QazAqparat – Kóshe saýdasymen aınalysý úshin Astanadaǵy bıznes sýbektilerine 596 jer ýchaskesi jalǵa berildi. Bul týraly elorda maslıhatynda ótken turaqty komıssııa otyrysynda «Astana» áleýmettik-kásipkerlik korporatsııasynyń basqarma tóraǵasy Erkeǵalı Álimqulov aıtty, dep habarlaıdy QazAqparat tilshisi.

«1000 oryn – kóshe saýdasy» baǵdarlamasy 2016 jyly qabyldandy. Onyń operatory bolyp «Astana» áleýmettik-kásipkerlik korporatsııasy bekitildi. Baǵdarlama aıasynda 2017 jyldyń naýryz aıynan bastap jer ýchaskelerin jalǵa berý týraly 831 shart jasaldy. Atap aıtsaq, 2017 jyly – 438, 2018 jyly – 178, 2019 jyly – 116, 2020 jyly – 67, 2021 jyly – 32 ýchaske jalǵa berildi», - dedi Erkeǵalı Álimqulov.

Onyń aıtýynsha, búginde áleýmettik-kásipkerlik korporatsııasy bıznes ókilderine berilgen 596 jer ýchaskesi boıynsha qosalqy jaldaý shartyn jasasqan. Kóbine bul oryndarda kókónis, jemis-jıdek jáne basqa da azyq-túlikter satylady. Sonymen qatar jalǵa alynǵan ýchaskelerde tez tamaqtaný pýnkteri de uıymdastyrylǵan.

Erkeǵalı Álimqulov kásipkerler jalǵa alǵan ýchaskelerde ornatylǵan pavılondar olarǵa usynylǵan obektilerdiń eskızderine sáıkes kelmeıtinin atap ótti. Saýda oryndaryn «Astana» ÁKK daıyndaǵan eskızder boıynsha salýǵa 5 mıllıonnan 15 mln teńgege deıin qarajat qajet. E.Álimqulov dereginshe, buǵan kóbiniń jaǵdaıy jete bermeıdi.