Kóshe saýdasy jasyryn sybaılas jemqorlyq joldarymen rettelýde – depýtat
ASTANA. KAZINFORM – Elimizde erekshe qajettilikteri bar azamattar men otandyq taýar óndirýshilerge basym quqyqty qamtamasyz etetin statsıonarlyq emes saýda obektileri úshin oryndar bólý qaǵıdalaryn ázirleý usynyldy. Májilistiń jalpy otyrysynda depýtat Aıtýar Aımaǵambetov osy máseleni kóterip depýtattyq saýal joldady.
«Bizge shaǵyn bıznes sýbektileri dúńgirshek, saýda pavılony, avtodúkenderge oryn alýǵa járdem surap júgindi. Máseleni zerttegennen keıin biz jaǵymsyz qorytyndyǵa keldik. Saýda jáne ıntegratsııa mınıstrligi, sondaı-aq jergilikti atqarýshy organdar bul máseleni óz betinshe qaldyrǵan. Qazir bul baǵyt durys rettelmegen jáne sybaılas jemqorlyq táýekelderi aımaǵynda tur», - dedi Aıtýar Qoshmambetov.
Sondaı-aq halyq qalaýlysy jergilikti atqarýshy organdardyń quzyretterin atady.
- kásipkerlik qyzmetti jáne ınvestıtsııalyq ahýaldy damytý úshin jaǵdaılar jasaý;
- statsıonarlyq emes obektilerdi ornalastyrý oryndaryn aıqyndaý jáne bekitý;
- statsıonarlyq emes saýda obektilerin ornalastyrý oryndaryn jáne baǵyttaryn bólýge konkýrstar ótkizý.
- jergilikti atqarýshy organdar belgilegen oryndardan tys jerlerde bólshek saýdany júzege asyrýǵa zańmen tyıym salynǵan.
«Elimizdiń eń iri megapolısi – Almaty qalasyndaǵy barlyq kóshe saýdasy zańnan tys júzege asyrylady. Ákimdikterdiń málimetinshe, elimizde barlyǵy 2 741 statsıonarlyq emes saýda nysany bar. Tek bir ǵana Astana qalasynyń kóshelerimen júrip, biz 1,5 myńnan astam dúńgirshekti anyqtadyq. Qazaqstanda sońǵy 5 jylda statsıonarlyq emes saýda obektilerin ornalastyrý úshin oryn bólýge 39 konkýrs ótkizildi. Almaty qalasynda, Atyraý, Shyǵys Qazaqstan, Jambyl, Jetisý, Batys Qazaqstan, Qaraǵandy, Qostanaı, Qyzylorda, Pavlodar jáne Soltústik Qazaqstan oblystarynda konkýrstar múldem ótkizilmegen. Konkýrssyz dúńgirshekterge jer ýchaskeleri qalaı berildi?! Ázirge bul úlken suraq», - deıdi ol.
Sondaı-aq depýtat salalyq mınıstrlikte jumyspen qamtylǵan jáne statsıonarlyq emes saýda obektilerinen tólengen salyqtardyń sany týraly naqty málimetter joq ekenin aıtty.
«Ókinishke qaraı bólshek saýda eldiń kóleńkeli ekonomıkasynyń kóshbasshysy bolyp qala beredi. Ákimdikterdiń jáne mınıstrliktiń nazarynan tys qalǵan jekelegen sheneýnikterdiń jaqtastarymen kóshe saýdasy jasyryn sybaılas jemqorlyq joldarymen rettelýde. Avtobýs aıaldamalarynda, saıabaqtarda, skverlerde, qarbalas kósheler boıynda jańa dúńgirshekter paıda boldy. Zańsyz saýda núkteleri jer, órt sóndirý jáne sanıtarlyq ınspektsııalar men polıtsııanyń baqylaýynan qalaı qutylatyny tańǵalarlyq», - deıdi A. Qoshmambetov.
Odan ári halyq qalaýlysy joǵaryda aıtylǵan jaıttardy qorytyndylaı kele, kelesi usynystardy alǵa tartty:
QR Saýda jáne ıntegratsııa mınıstrligine:
1. Erekshe qajettilikteri bar azamattar men otandyq taýar óndirýshilerge basym quqyqty qamtamasyz etetin statsıonarlyq emes saýda obektileri úshin oryndar bólý qaǵıdalaryn ázirleý;
2. E-Qazyna memlekettik portalynda dúńgirshekterge, avtodúkenderge, sondaı-aq aýyl sharýashylyǵy/fermerlik jármeńkelerge oryn bólý máseleleri boıynsha ashyq konkýrstar ótkizý múmkindigin pysyqtaý.
Jergilikti atqarýshy organdarǵa:
1.Іshki ister organdarymen birlesip-barlyq óńirlerde kóshe saýdasy bóliginde tártip ornatý;
2.Statsıonarlyq emes saýda obektilerdi ornalastyrý oryndary men marshrýttaryn anyqtaý jáne bekitý;
3.Statsıonarlyq emes saýda obektilerin ornalastyrý oryndary men marshrýttaryn bólýge konkýrstar ótkizý.
Sybaılas jemqorlyqqa qarsy is-qımyl agenttigine:
1.Statsıonarlyq emes obektilerdi zańsyz ornalastyrý máselesi boıynsha ýákiletti organdardyń qyzmetine tekserý júrgizý;
2.Laýazymdy tulǵalardy zańmen belgilengen jaýapkershilikke tartý.
