Kóshe óneri men vandalızmdi qalaı ajyratamyz — sarapshynyń pikiri
ASTANA. KAZINFORM — Ruqsat etilmegen graffıtı máselesi tek qalalyq ortanyń estetıkasyna ǵana emes, sonymen qatar qoǵamdyq keńistikti qurmetteýge jáne menshik quqyǵyna da qatysty másele bolyp otyr. Bul jaıly Kazinform tilshisine bergen suhbatynda Qazaqstannyń Ekologııalyq uıymdary qaýymdastyǵynyń basqarma tóraǵasy Aıgúl Soloveva málimdedi.
Onyń aıtýynsha, qazirgi kóshe óneri men vandalızmniń ara jigin ajyratyp, uǵymdarǵa naqty anyqtama berý qajet.
— Qazirgi zamanǵy qalalyq óner men vandalızm arasyndaǵy shekarany anyqtaý qajet. Maǵan salsa, bul eki uǵymnyń ara jigin ajyratyp, neni vandalızm, neni graffıtı dep ataý qajettigin naqty kórseter edim. Keıde graffıtı talant ıesiniń týyndysy bolýy da múmkin, — deıdi Aıgúl Soloveva.
Ol keskinniń mazmunyn nemese kórkemdik tusyn ǵana emes, sonymen qatar onyń nemen salynǵan da eskerý mańyzdy ekenin atap ótti.
— Shyǵarmashylyq degenimiz — óz oıyn bildirýdiń múmkindigi. Biraq bireý turǵyn úıdiń, ınfraqurylym nysanynyń nemese qoǵamdyq ǵımarattyń qasbetine ruqsatsyz salyp ketse, bul bótenniń múlkine jáne qalanyń menshigine qol suǵý emes pe degen zańdy suraq týyndaıdy, — dep atap ótti sarapshy.
Onyń pikirinshe, óner men vandalızmniń arasyn ajyratarda, sýret salýshy menshik ıesiniń nemese ýákiletti organnyń kelisimin aldy ma, qasbetke zaqym tıgizdi me, ony tazalaý nemese qalpyna keltirý qajet pe — mine osylardy eskerý qajet. Ol ǵımarattyń mártebesi, zaqymdaný dárejesi jáne sýret salýdyń jıiligi mańyzdy.
— Tipti kórkem oryndalǵan jumystyń ózi de menshik ıesiniń kelisiminsiz salynsa, múlikke zııan keltirýi múmkin, — dep atap ótti ol.
Soloveva qalalyq ortany baǵalaý kezinde turǵyndardyń pikirleri men qazirgi úrdisterdi eskere otyryp, talqylaýǵa qalanyń qoǵamdyq keńesteri qatysýy kerek dep sanaıdy.
Sarapshy sonymen qatar máseleniń aýqymyn — shaǵymdar sanyn, múlikke keltirilgen zaqymdy jáne graffıtıdi tazalaý men qaıta boıaý shyǵyndaryn obektıvti baǵalaý úshin júıelengen statıstıka qajet ekenin atap ótti.
Eske sala keteıik, 19 qyrkúıekte Memleket basshysy Qasym-Jomart Toqaev Astana ákimi Jeńis Qasymbekke ǵımarattardyń qabyrǵasyna graffıtı salatyn tulǵalarǵa qatysty qatań shara qoldanýdy tapsyrdy. Memleket basshysynyń aıtýynsha, elimizdiń qalalarynda buǵan jol bermeý kerek. Sondaı-aq álemde vandalızm men buzaqylyqtyń soraqy kórinisi sanalatyn, qoǵamdyq oryndardy búldiretin «shyǵarmashylyqtyń» mundaı túrine tolyq tyıym salatyn zańdyq-normatıvtik sharalar qabyldaǵan jón.
