Kóshe ataýyn aýystyrýǵa bıýdjet qarjysy jumsalmaıdy - Qostanaı

QOSTANAI. QazAqparat – Qostanaı oblystyq máslıhatynyń kezekten tys sessııasynda oblys ortalyǵyndaǵy kóshelerdiń ataýyn ózgertý máseleleri qaraldy, dep habarlaıdy QazAqparat tilshisi.

Kóshe ataýlaryn ózgertý jóninde Qostanaı oblysy ákimdigi tilderdi damytý bóliminiń bastyǵy Gúljan Meńdekınova baıandama jasady.
«2019 jylǵy 20 naýryzda QR Prezıdenti Qasym-Jomart Toqaev ulyqtaý rásiminde sóılegen sózinde Elbasy Nursultan Nazarbaevtyń táýelsiz Qazaqstan tarıhyndaǵy sińirgen eńbegin baǵalaýdy atap ótti. Prezıdent ár oblystyń ortalyq kósheleriniń birin Ult kóshbasshysynyń esimimen ataý týraly usynys jasady. Osydan bastap Elbasynyń esimin qalalar men aýdandardyń kóshelerine berý sharalary qolǵa alyndy. Bul estafetany bizdiń óńir de jalǵastyrdy. «Sokolov Sarybaı» ken baıytý qory, «Qostanaı mıneraldary», «Baıan sulý», «SaryarqaAvtoProm» AQ sııaqty oblystyń iri qala qurýshy kásiporyndary, aýylsharýashylyq zaýyttarynyń basshylary, Qostanaı avtomobıl joldary kolledjiniń ujymy ortalyq kóshelerdiń birine Tuńǵysh Prezıdent esimin berý jóninde jazbasha ótinish joldady»,- dedi G. Meńdekınova.
Osy ótinishterge sáıkes, Qostanaı qalasynyń ákimdigi men máslıhaty Gagarın kóshesin N.Nazarbaev dańǵyly dep atap, Gvardeıskıı kóshesiniń ataýyn Gagarın dep ózgertý jumystaryn júrgizdi. Tamyz aıynyń basynda oblys ákimdiginiń usynysy respýblıkalyq onomastıka komıssııasynyń otyrysynda qaralyp, qoldaý tapty. Bul jıynda oblysqa belgili dáriger Dmıtrıı Gerasımovtyń esimin «Áýejaı» shaǵyn aýdanyndaǵy kóshelerdiń birine berý týraly usynys ta maquldandy.
Gúljan Meńdekınova kóshe ataýlaryn aýystyrýǵa bıýdjettik qarajat jumsalmaıtynyn aıtty.
«Bul jumys demeýshilik qarajat esebinen júzege asyrylady. Jalpy somasy 3 mıllıon teńgeden asady. Túıtkildi máselelerdiń bári sheshildi»,- dep túıdi basqarma basshysy.
Depýtattar bul sheshimdi biraýyzdan qoldady.