«Kóshbasshy joly. Astana» fılminiń treıleri jarııalandy
ASTANA. QazAqparat - «Satai film» kınokompanııasy YouTube-taǵy resmı kanalynda «Kóshbasshy joly. Astana» fılminiń treılerin jarııalady, dep habarlaıdy QazAqparat tilshisi.
«Dostar, «Kóshbasshy joly. Astana» fılminiń resmı treılerin tanystyrýǵa qýanyshtymyz. Fılmdi 16 jeltoqsannan bastap elimizdiń barlyq kınoteatrlarynan kórýge bolady», - dep jazdy rejısser Aqan Sataev Instagram paraqshasynda.
Kınotýyndy «Kóshbasshy joly» kınoepopeıalarynyń kezekti bólimi bolyp tabylady. Kartınada Qazaqstan astanasynyń qalyptasý tarıhy, onyń boı kóterýi barysyndaǵy Nursultan Nazarbaevtyń eńbegi baıandalady.
Fılmde 1994 jyldyń shildesinde Almaty astanasyn Aqmolaǵa kóshirý týraly tarıhı sheshimniń qabyldanýymen baılanysty oqıǵalar kórsetilgen.
Eske sala ketsek, buǵan deıin «Kóshbasshy joly. Astana» kınoepopeıasynyń sońǵy túsirilimi júrip jatqanyn habarlaǵan bolatynbyz. Buǵan deıin qazaqstandyqtardyń nazaryna kınoepopeıanyń 5 bólimi usynylǵan edi.
