Kóshbasshy jastarǵa kóp qarjysyz startapty júzege asyrý joldary tanystyryldy
KÓKShETAÝ. QazAqparat - Kóshbasshy jastarǵa kóp qarjysyz startapty júzege asyrý joldary tanystyryldy, dep habarlaıdy QazAqparat tilshisi.
Aqmola oblysyndaǵy «Zeren» respýblıkalyq jastar bilim lagerinde elimizdiń ár óńirinen jınalǵan kóshbasshy jastarǵa «Astana-Hab» tehnoparkiniń mamandary trenıng ótkizdi.
«Biz Zerendige jastarǵa startap jasaýyna kómektesýge keldik. Mundaǵy olardyń eń basty qorqynyshy, ol startapty júzege asyrýda úlken qarajat pen komandany izdeýdi qajet etýi. Qıyndyqtar árıne, kóp. Sondyqtan, meniń basty maqsatym paıdaly jáne qyzyǵýshylyq týdyratyn ónimge basymdyq bere otyryp, startapty úlken qarjysyz-aq jasaýǵa bolatynyn túsindirip, úıretý»,- dep atap ótti «Astana-Hab» tehnoparki «Kompra» kompanııasynyń dırektory Ashat Serǵazın.
Sonymen qatar, ol «Astana-Hab» bilim berý, synaqtan ótkizý baǵytynda damý úshin kómektesetin birinshi kezekte qaýymdastyq ekenin atap ótti.
«Sondyqtan, «Astana-Hab» bazasynda jınalǵan trekerler qalyptasqan startap-komandalarǵa ózderiniń laıyqty ornyn, tabys ákeletin ónimderin jáne klıentterin tabýǵa kómektesedi. Sharanyń alǵashqy kúni jastarda ózderi ashqysy keletin mobıldi qosymshalary týraly birneshe ıdeıanyń baryna kóz jetkizdik», - dep tolyqtyrdy Ashat Sergazın.
Eske sala keteıik, keshe Aqmola oblysynyń «Zeren» saýyqtyrý ortalyǵynyń bazasynda «Zeren» respýblıkalyq jastar bilim lageriniń «Digital-urpaq» atty birinshi aýysymy resmı túrde ashylǵan bolatyn. Oǵan elimizdiń ár óńirinen kelgen jastar uıymdarynyń kóshbasshylary, jas kásipkerler, «Qazaqstannyń 100 jańa esimi» jobasynyń qatysýshylary quralǵan 300 jas qatysýda. Lager 12-26 tamyz aralyǵynda 3 taqyryptyq aýysymda ótkiziledi.
