Kóshbasshy áıelder «Saltanat» ulttyq baǵdarlamasyn ázirleýdi usyndy

Astanada genderlik teńdik pen zorlyq-zombylyqqa qarsy kúres máseleleri týraly jıynda «Saltanat» ulttyq baǵdarlamasyn ázirleý usynyldy, dep habarlaıdy Kazinform.

Astanadaǵy kóshbasshy áıelder kezdesýinde sóz sóılegen «Ádil sóz» sóz bostandyǵyn qorǵaý qoǵamdyq qorynyń prezıdenti Qarlyǵash Jamanqulova «Saltanat» ulttyq baǵdarlamasyn ázirleýdi usyndy. 

«Tyǵyryqqa kelip tirelgenimizdi bárimiz túsinip otyrmyz. Endi qyzdardyń bosqa ólip ketýine jol bermeıik. Saltanat (Núkenova – red.) bizdiń sımvolymyz bola alady dep oılaımyn. Máselen, shetelde istiń alǵa júrýine yqpal etken adamdardyń esimi zańǵa beriledi. Men búgin zań jazyp qana qoımaı, ulttyq baǵdarlama jazyp, ony «Saltanat» dep ataýdy usynamyn. Osy kúnge deıin atqara almaǵan jumystarǵa emes, qazirgi ýaqytta ne isteı alatynymyzǵa nazar aýdarǵym keledi», - dedi ol. 

Óz kezeginde spıker baǵdarlamalardyń júıeli bolýy kerektigin jáne turmystyq zorlyq-zombylyq týraly zań babyn krımınalızatsııalaý jetkiliksiz ekenin aıtty. 

«Bul zorlyq-zombylyqtan zardap shekken áıelderdiń aryz-shaǵymynyń azaıýyna ákep soǵady degen sarapshylardyń pikirimen ishinara kelisemin. Mysaly, joǵary bilimi bar, qalada turatyn áıelder bar jáne shaǵyn aýyldarda baılanyssyz qalǵan áıelder taǵy bar. Biz zańnyń bárine birdeı áreket etetinin túsinýimiz kerek. Sondyqtan is-sharalar keshendi bolýy kerek. Biz búginde osy formatty keńeıtip, doktrına, daǵdarys ortalyqtary, qoldaý ortalyqtary turǵysynan qarastyra alamyz», - dedi Jamanqulova.

Sonymen birge, qor basshysy harrasmenttiń áli kúnge deıin qylmys bolyp sanalmaıtynyn atap ótti. 

«Áıelge tıisý, qyryndaý, izinen qalmaý áli qylmys dep tanylmaǵan. Bizde bul týraly tipti eńbek kodeksterinde túsinik joq. Bir tragedııa aıasynda kóptegen máseleni kóterýge tyrysyp jatqanymyzdy túsinemin. Doktrınadan bastaıyq. Bizge Prezıdenttiń jeke ózi qoldaıtyn úlken keshendi doktrına qajet. Jaı ǵana bas qosyp, sony birge jazýdy usynamyn, oǵan ata-ana tárbıesi, ońaltý, fızıkalyq zorlyq-zombylyq jazasy, jumys ornyndaǵy tıisý jaýapkershiligi, etıka men standarttardy saqtaýdy qosý kerek. Harrasmenttiń aldyn alý boıynsha jarty jylda bir ret trenıngter ótkizý de paıdaly bolar edi. Muny memlekettik qyzmetten bastaýǵa bolady. Memleket qyzmet qoǵamǵa standart beredi. Turmystyq zorlyq-zombylyq qurbylarymyzdyń arasynda jıi kezdesedi, bárimizdiń osyndaı tanystarymyz bar. Saltanattyń oqıǵasynan keıin bul máselelerdi eńseretin múmkindikter terezesi ashyldy», - deıdi qoǵam belsendisi. 

Aıta keteıik, Astanada depýtattar, kásipkerler, azamattyq qoǵam ókilderi men jýrnalıst sekildi kóshbasshy áıelder genderlik teńdik pen zorlyq-zombylyqqa qarsy kúres máselelerin talqylady. Jıyndy AQSh-tyń halyqaralyq damý agenttiginiń (USAID) qoldaýymen «Qadyr-qasıet» qoǵamdyq qory uıymdastyrǵan. 

Eske sala ketsek, 9 qarashada Astanadaǵy Baý meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıy Saltanat Núkenovany soqqyǵa jyqqanyn jazǵan bolatynbyz. 

Sondaı-aq Іshki ister mınıstrligi Astana meıramhanasyndaǵy kisi ólimi boıynsha Qýandyq Bıshimbaevtyń ustalǵanyn rastady.