Qoshanov: Jasandy ıntellekt týraly zań – Prezıdent bastamasyn iske asyrý jolyndaǵy irgeli qadam

ASTANA. KAZINFORM – Qazaqstan álemde jasandy ıntellekt týraly zań qabyldaǵan alǵashqy elderdiń qatarynda. Bul týraly Májilistiń jalpy otyrysynda palata spıkeri Erlan Qoshanov aıtty.

— Biz jańa ǵana óte mańyzdy zań qabyldadyq. Memleket basshysy taıaýdaǵy Joldaýynda aldymyzǵa úsh jyl ishinde Qazaqstandy jappaı tsıfrlyq elge aınaldyrý jóninde aýqymdy mindet qoıdy. Bul progressıvti ıdeıany Prezıdentimiz búgin álemniń eń basty minberi — Birikken Ulttar Uıymynyń tórinen de jarııalady. Qasym-Jomart Kemeluly Toqaev: «Qazaqstan jasandy ıntellektini tehnologııalyq jetistik dep qana emes, adamzat progresine qozǵaý salatyn zor tabys retinde qarastyrady» dep atap ótti. Bul jahandyq úrdis ekenin kórip otyrmyz. Prezıdent atap ótkendeı, jappaı tsıfrlandyrý jáne jasandy ıntellektini keńinen qoldaný elimizdiń ulttyq basymdyǵyna aınaldy, — dedi Májilis tóraǵasy.

Erlan Qoshanovtyń paıymynsha, búgin qabyldanǵan Jasandy ıntellekt týraly zań — osy bastamany iske asyrý jolyndaǵy irgeli qadam. Ol elimizdiń tsıfrlyq damýyn jańa deńgeıge shyǵarýǵa jol ashatyny anyq.

— Qazaqstan álemde mundaı zań qabyldaǵan alǵashqy elderdiń qatarynda. Zańdy qabyldaý barysynda tsıfrlandyrý salasyndaǵy ozyq álemdik tájirıbeler men táýekelderdiń bári eskerildi. Ádilettilik, zańdylyq, ashyqtyq, adam quqyqtary men jeke málimetterdi qorǵaý basty prıntsıp retinde qarastyryp otyr, — dedi ol.

Palata spıkeri búgingi qabyldanǵan zań jasandy ıntellekt salasy úshin, jalpy memleketimizdiń damýy úshin úlken serpilis beretinin aıtty.

— Bizdiń aldymyzda jasandy ıntellekt máseleleri boıynsha mańyzdy parlamenttik tyńdaý tur. Sondyqtan keń aýqymdy pikirtalas aldaǵy juma kúni jalǵasyn tabady, — dedi ol.