Qoshanov Úkimettiń kiris esebi týraly: ádemi tsıfrlarmen bezendirilgen baıandama

ASTANA. KAZINFORM — Májilis tóraǵasy Erlan Qoshanov el bıýdjetin qalyptastyrý kezinde, ásirese kiris bóliginde únemi durys boljam jasalmaıtynyn aıtty.

«Bıyl ekonomıkalyq jaǵdaıdyń kúrdeli ekenin bilemiz. Shynyn aıtý kerek, jyldan jylǵa qaıtalana beretin problema kóp. Bıýdjetti qalyptastyrý kezinde, ásirese kiris bóliginde únemi durys boljam jasalmaıdy. Áleýmettik-ekonomıkalyq damý jospary naqty múmkindiktermen qabysa bermeıdi. Nátıjesinde eldegi jaǵdaı naqty ekonomıkalyq jaǵdaıdan alshaq. Memlekettik organdar jyl saıyn bıýdjetti qaraý kezinde bizdi memlekettik qazynanyń teńgerimdi ekenine sendiredi, al jyl sońynda kiris jetkiliksiz bolyp Ulttyq qordyń qarajatyna júginemiz. Elimizdiń bıýdjeti Ulttyq qordyń qarajatynsyz sheshimin tappaı keledi», — dedi Erlan Qoshanov Májilistiń jalpy otyrysynda.

Sondaı-aq, Májilis spıkeri Úkimettiń bıýdjet kiristeri esebin synǵa aldy. 

«Úkimet ishki jalpy ónimi ósiminiń oń ekonomıkalyq qarqyny týraly ádemi tsıfrlarmen bezendirilgen baıandama jasaıdy. Al is júzinde biz ony kórip otyrǵan joqpyz. Shaǵyn jáne orta bıznes ekonomıkanyń qozǵaýshy kúshi bolýy kerek. Biraq, kásipkerliktiń damý qarqyny jáne belsendiligi mardymsyz. Infraqurylymdyq jobalarǵa, óńirlerdi damytýǵa qomaqty qarjy quıyp otyrmyz, biraq kiris kózge kórinbeıdi», — deıdi ol.

Aıta keteıik, búgin Májilis bıýdjetti naqtylaýǵa arnalǵan zańdy qabyldady.