Qoshanov: Prezıdent reformalary áıelderdiń ózin-ózi damytýyna jańa jaǵdaı jasaıdy
ASTANA.KAZINFORM — Qazaqstannyń túkpir-túkpirinen kelgen 120-dan astam belsendi áıel «AMANAT» partııasynyń Áıelder qanaty uıymdastyrǵan «Áıelder – jasampaz kóshbasshylar» atty saıası kóshbasshylyq boıynsha oqý kýrstaryna qatysty. Búgin olar Májilis Spıkeri, partııa tóraǵasy Erlan Qoshanovpen kezdesti.
Kezdesýdi asha otyryp, Erlan Qoshanov jınalǵandardy aldaǵy 8 naýryz — Halyqaralyq áıelder kúnimen quttyqtady. Ol Prezıdent Qasym-Jomart Kemeluly Toqaevtyń aýqymdy saıası reformalarynyń arqasynda elde genderlik teńdikti qamtamasyz etý jáne otbasylyq qundylyqtardy nyǵaıtý máseleleri sapaly jańa deńgeıde sheshilip jatqanyn atap ótti.
— Memleket basshysy II respýblıkalyq máslıhat depýtattarynyń forýmynda atap ótkendeı, ókildi bılik organdaryndaǵy áıelderdiń sany ósti, sondaı-aq áıelderdiń ártúrli salalardaǵy bastamalary jan-jaqty memlekettik qoldaýǵa ıe bolýda. Partııa músheleriniń shamamen 60%-y - áıelder. Búgingi tańda, jańa saıası jaǵdaılarǵa qaramastan, «AMANAT» partııasy óz pozıtsııasyn nyǵaıtýyn jalǵastyrýda. Bizdiń Áıelder qanaty partııa men áıelder qaýymdastyǵy arasyndaǵy shynaıy kópirge aınaldy. Bul árbir belsendi áıeldiń daýysy estilip, onyń ıdeıalary júzege asatynyna kepildik beredi. Sonymen qatar Áıelder qanaty qoǵamdyq-saıası pikirtalastarǵa ártúrli kózqaras pen tereńdik qosyp otyr, — dedi ol.
Erlan Qoshanov sondaı-aq «AMANAT» partııasynyń Áıelder qanaty músheleri zań shyǵarý jumysyna belsene qatysyp júrgenin atap ótti. Máselen, olardyń usynystary áıelderdiń quqyqtaryn qorǵaý jáne balalardyń qaýipsizdigin qamtamasyz etý máseleleri boıynsha zań jobasyn ázirleý kezinde eskerildi. Bul zań tolyq kúshine endi, búginde osy saladaǵy qylmystyq quqyq buzýshylyqtar edáýir azaıdy, turmystyq zorlyq-zombylyq týraly shaǵymdar sany úshten birge qysqardy, el boıynsha 69 daǵdarys ortalyǵy men baspana ashyldy. Budan bólek, búginde depýtattar talqylap jatqan psıhologııalyq qyzmet týraly zań jobasyna da kóshbasshy áıelder tarapynan oryndy túzetýler engizildi.
Sondaı-aq partııa Tóraǵasy áıelderdiń quqyqtaryn buzǵany úshin zańnamany qatańdatýdyń mańyzdylyǵyna nazar aýdardy. Sońǵy ýaqytta «qalyńdyq urlaý» dástúrin jeleý etip, keıbir jastar jas qyzdardyń quqyqtaryn buzyp, olardy erkinen tys nekege turǵyzýda. Bul máselege Memleket basshysy Atyraýda ótken Ulttyq quryltaı otyrysynda erekshe nazar aýdardy. Sondyqtan depýtattar «nekege májbúrleý» úshin qylmystyq jaýapkershilikti engizý normalaryn usyndy. Bul rette, Májilis depýtattary Áıelder qanatynan da usynystar kútedi.
Májilis Spıkeri Áıelder qanaty aldynda turǵan birqatar jańa mindetterdi de belgiledi. Atap aıtqanda, «Tomiris» jobasynyń aýqymyn keńeıtip, bolashaq kóshbasshylardy stýdenttik kezden bastap daıyndaýǵa nazar aýdarý qajet. Ol úshin joǵary oqý oryndarymen yntymaqtastyq ornatý kerek, ásirese saıasattaný jáne áleýmettik mamandyqtardyń áleýetine kóńil bólý mańyzdy. Sonymen qatar jobaǵa qatysýshylardy taldamalyq jumysqa belsendi tartý jáne áıelder kásipkerligin qoldaýdy kúsheıtý kerek.
Erlan Qoshanov áıelderdiń jumysqa ornalasýy men ózin-ózi damytý múmkindikterin keńeıtýdiń, sondaı-aq olardyń ekonomıkaǵa, saıasatqa jáne basqa da salalarǵa belsendi qatysý mádenıetin qalyptastyrýdyń mańyzdylyǵyn atap ótti.
Іs-sharada sondaı-aq Konstıtýtsııalyq Sot Tóraǵasy Elvıra Azımova, Mádenıet jáne aqparat mınıstri, Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa tóraıymy Aıda Balaeva, Qazaqstandaǵy Konrad Adenaýer qory ókildiginiń dırektory Vıktor Frank sóz sóıledi.
Budan keıin óńirlerden kelgen qatysýshylar óz jobalary týraly baıandap, áıelder kóshbasshylyǵyn damytý jóninde usynystaryn jetkizdi. «AMANAT» partııasynyń Aqtóbe oblystyq máslıhatyndaǵy fraktsııasynyń jetekshisi Kúlparshyn Aıdarhanova aýyl jastaryna óz áleýetin ashýǵa jáne jeke kásibin bastaýǵa kómektesetin «DEM» jobasy týraly aıtyp berdi. Jambyl oblysynyń Áıelder kúshteri alıansynyń tóraıymy Ámına Qaınazarova kásipkerlikti jańa bastaǵan áıelder úshin 3-5 jylǵa salyq jeńildikterin engizýdi usyndy. Atyraý oblysy Qamysqala aýyldyq okrýginiń ákimi Rafıǵat Tájıdenova kásipkerlik qyzmet úshin jer telimderin bólý tártibin jeńildetýdi jáne bos úılerdi kommertsııalyq nysandarǵa aınaldyrýdy usyndy. «IteachMe» qorynyń dırektory Zahıra Begalıeva tsıfrlandyrý múmkindikteri týraly aıtyp, onyń erekshe qajettilikteri bar adamdarǵa úıden jumys isteýge jol ashatynyn atap ótti. Petropavldyq «Sensitive» ansambliniń kórkemdik jetekshisi Olga Rostovşıkova estý qabileti tómen jáne múlde estimeıtin balalardy áleýmettendirý jobalary jaıynda bólisti. Al Shyǵys Qazaqstan oblysynan kelgen, 30 jyldyq memlekettik qyzmet tájirıbesi bar Galına Pahomova adamdarmen jumys isteýdegi kásibı tájirıbesi jáne kúrdeli jobalardy júzege asyrýdaǵy jetistikterimen bólisti.