Qoshanov: Prezıdent ár Joldaýynda eldi damytý úshin júıeli reformalardy iske qosady

ASTANA. QazAqparat - Bıyl memlekettiń ekonomıkadaǵy úlesi 14%-ǵa deıin qysqardy, 600 myńnan astam otandasymyz jumysqa ornalastyryldy, bastaýysh synyp oqýshylary tegin ystyq tamaqpen qamtyldy. Memleket basshysynyń Joldaýlary qalaı júzege asyrylyp jatqany týraly Premer-Mınıstr Álıhan Smaıylov Májilistegi «AMANAT» fraktsııasynyń keńeıtilgen otyrysynda baıandady, dep habarlaıdy QazAqparat.

Sóz basynda Májilis spıkeri, «AMANAT» partııasynyń tóraǵasy Erlan Qoshanov fraktsııanyń keńeıtilgen otyrysyn asha otyryp, byltyrǵy referendýmda halyq Memleket basshysynyń saıası reformalaryn tolyq qoldaǵanyn jáne jańarǵan Ata Zań aýqymdy ózgeristerdiń bastaýy bolǵanyn atap ótti. Sondaı-aq, ol Memleket basshysy ár Joldaýynda elimizde ádildik pen demokratııa prıntsıpterin ornyqtyrý jáne nyǵaıtý jolynda júıeli túrde, kezeń-kezeńimen jaǵdaı jasap kele jatqanyn alǵa tartty.

«Memleket basshysynyń bastamasymen bıyl alǵash ret jeńiske jetken partııa Premer-Mınıstrdiń kandıdatýrasyn usyndy. Búgin jańa saıası maýsymnyń qarsańynda biz taǵy bir dástúrdi bastaǵaly otyrmyz. Alǵash ret fraktsııa otyrysynda Prezıdenttiń joldaýlary men saılaýaldy baǵdarlamalarynyń oryndalýy jóninde Premer-Mınıstrdiń aqparatyn tyńdaıtyn bolamyz. Sondyqtan basym daýysqa ıe bolǵan partııa retinde fraktsııa otyrysyna Úkimet basshysyn arnaıy shaqyryp otyrmyz», – dedi Erlan Qoshanov.